स्कूल फीस नइ जमा करिस… छात्रा ल परीक्षा हॉल ले बाहिर निकालीस

राजनांदगाव। जिला के ड्रीम इंडिया पब्लिक स्कूल ह मनमानी करत हुए एक छात्रा ल परीक्षा म बइठे बर नइ दिस। छात्रा के पालक मन जब जिला प्रसासन ल एकर सिकायत करिन, तब छात्रा ल परीक्षा म बइठे के अनुमति मिल पाइस। आप मन ल बता दन कि LKG के छात्रा वंशीका यादव ल स्कूल फीस नइ जमा कराए के सेती परीक्षा हॉल ले बाहिर निकाल दे गे रिहीस। उहें प्रिंसीपल ले जब ये मामला म बात करे गिस, त ओहर लइका के माता पिता ल टीचर-पैरेंटस मीटिंग के दउरान बद्तमीजी करे के बात कहिस, फिलहाल जिला प्रसासन ये मामला के जांच करके कार्रवाई के बात कहिस हे।
इंदिरा मार्केट के पतली गली ह चौड़ा दिखत हे
दुर्ग के इंदिरा मार्केट म पाछु 1 सप्ताह ले जारी अतिक्रमन हटाओ अभियान अब समाप्त हो गिस हे। एकर चलत अतिक्रमन दल ल कुछ जगह म बिरोध के सामना घलो करे बर पड़िस। ये दउरान लोगन मन ल सांत कराए बर स्थानीय बिधायक अरुण वोरा घलोक मउका म पहुंचिस। जब अबैध कब्जा हटाए गिस त इंदिरा मार्केट के पतली गली ह चौड़ा दिखत हे।
ऋचा जोगी के नेतृत्व म ग्रामीन मन के धरना प्रदर्सन
मंगलवार के अभनपुर म ग्रामीन मन फैक्ट्री के मनमानी अऊ स्थानीय प्रसासन के खिलाफ धरना प्रदर्सन करिन, येकर संग ही एसडीएम कार्यालय के घेराव करके अपन नाराजगी घलो जताइन। आरोप हे कि मजदूर मन ल फैक्ट्री ले बेदखल करे बर अलग-अलग बहाना बनाए जात हे। ग्रामीन मन के कहना हे कि फैक्ट्री ले 125 स्थानीय मजदूर मन ल निकाल दे गिस, उहें बाकी मजदूर मन ल कई महीना ले बेतन घलो नइ दे गे हे, फेर कुछ मजदूर मन ल प्रमोसन के लालच देके दूसर प्रान्त म सिफ्ट करे जात हे। उहें JCCJ ह मजदूर मन ल अपन समर्थन दिस अऊ ऋचा जोगी खुद धरना म समिल घलो होइस हें।
एएसआई नागेंद्र सिंह यादव निलंबित
रायपुर के सरदार वल्लभभाई पटेल आवासीय कॉलोनी म पुलिसकर्मी मन म मारपीट के मामला आगू आए हे। आप मन ल बता दन कि बिधानसभा थाना म पदस्थ ASI नागेंद्र सिंह यादव ह कोतवाली अऊ गंज थाना के कांस्टेबल के संग बइठक के दउरान मारपीट करिस। जब ईलाज बर दूनों आरक्षक ल मेकाहारा लाए गिस त एएसआई अउ उखर बेटा उहां घलो जाके मारपीट सुरू कर दिन हे। जेखर रिपोट करे गिस अउ बड़े अधिकारी मन ल बताए गिस। एखर बाद एएसआई ल निलंबित करे दे गेहे।
लोक सुराज म नइ होइस निराकरन
जांजगीर म लोक सुराज अभियान के तहत समाधान सिविर के आयोजन करे जात हे। जेमा आए आवेदन के निराकरन घलो करे जात हे। फेर उहें जिला म कई अइसन मामला हे, जेमन के निराकरन नइ करे गिस हे। आप मन ल बता दन कि नवागढ़ क्षेत्र के गौद गांव म समाधान सिविर म घलो आवेदन के निराकरन के दावा करे गे रिहिस। फेर ग्रामीन मन जम्मों दावा ले असंतुस्ट दिखत हे।
अधिकारी मन चिमनी के रोसनी म पढ़ाई करे के बात करिन
कोरिया के घुटरा ग्राम पंचायत म जिला स्तरीय जनसमस्या निवारन सिविर के आयोजन करे गिस। ये सिविर म संसदीय सचिव चंपादेवी पावले के संग कोरिया कलेक्टर नरेन्द्र दुग्गा समेत बिभिन्न बिभाग के जिला स्तरिय अधिकारी मउजूद रिहिन। उहें ये सिविर म लोगन मन के समस्या कम सुने गिस अऊ अधिकारी मन सरकार के कार्यक्रम के गुणगान जादा करिन। आप मन ल बता दन कि सिविर के दउरान जब ग्रामीन मन बिजली नइ होए के सिकायत करिन, त कलेक्टर अऊ अधिकारी मन चिमनी के रोसनी म पढ़ाई करे के बात करिन।