मुंगेली म पार्किंग के समस्या… लाल बत्ती ह घलो मजाक बन के रहिगे हे

नवनीत शुक्ला /मुंगेली । हमर जिला के हर बात ह निराला हे। इहां जेन काम करे जाथे तेन अपन आप म अलग रइथे । जइसन स्टेडियम बनाये गिस खेले बर अउ काम आवत हे गोदाम के । वइसने बैंक , एटीएम, अस्पताल के आघू लगे हे नो पार्किंग के बोर्ड । हमर नगर के दाऊपारा चउक म स्थिति बैंक आफ इंडिया के ब्रान्च अउ एटीएम के आघू म लगे नो पार्किंग के बोर्ड ह ये बतावथ हे के बेभाग ह कतका सजग हे । अगर बैंक अउ एटीएम म अवइया मन ह गाड़ी म आही त अपन वाहन ल कोन मेन रखही। ये बात ह सोचे के विषय हे । न त इहां पार्किंग के जगा हे अउ न ही कोनो मइदान । अइसन अउ कतको जगा हे जिहां ये देखे बर मिल जाही। ये ह बेभाग के लापरवाही ल दिखथे । लाल बत्ती घलो ह एक मजाक बन के रहिगे हे । चउक म सिपाही साहेब खड़े रहिथे अउ लाल बत्ती के बाद घलो कतको गाड़ी वाला मन ह अपन गाड़ी ल चला के आघू निकल जात हे । मानो बेभाग ल चिढ़त हे । जब ले मुंगेली ह जिला बनिस, तब ले इहां यातायात के दबाव हर बढ़ गिस । पर बेभाग ह तहसील अइसन रवैया अपनाय हे । अगर कोनो अधिकारी के दबाव आइस त महज खानापूर्ति के कार्यवाही करे जाथे । जिला बने के बाद आस पास के लोगन ह अपन हर काम बर मुंगेली आथे । जेखर कारण इहां यातायात के दबाव बढ़त जात हे। अउ बेभाग ह यातायात बेवस्था सुधारे बर कोनो ठोस पहल नइ करत हे ।