10 रुपए अउ एक किलो चावल नइ देना महंगा पड़़गे ए परिवार ल …बंद हे हुक्का-पानी

बिलासपुर।  जांजगीर जिला मुख्यालय के वार्ड 10 तलवा पारा मोहल्ला म रहइया  एक परिवार के बहिस्कार सिरिफ एखर सेती करे दे गेहे के  परिवार के मुखिया ह मोहल्ला म एक मउत होय के बाद मदद के रूप म 10 रुपिया अउ  एक किलो चावल नइ देय हे। अब ए परिवार के हुक्का-पानी घलो मोहल्ला म बंद करे देय गिस।

सूर्यवंशी परिवार 10 महीना ले दिक्कत भरे जीवन जीए बर मजबूर हे। आलम ए हे के  ना तो इमन ले कोनो बात करथे अउ ना ही कोनो दुकानदार इम ल सामान देवत हे। ए वजह ले मानसिक तनाव म आके परिवार के एक बेटा ह जहर के सेवन कर लिस।

दिलीप सूर्यवंशी के परिवार के बहिस्कार फरवरी म करे गिस । पीड़ित परिवार  ह एखर सिकायत कलेक्टर के जनदरसन म करे हे, लेकिन एला अनदेखा कर देय गे हे। उहें अब परिवार घर-बार ल बेचके दूसर जगह बसे के तइयारी करत हवय।  परिवार के आरोप हे के कुछु रसूखदार मन ल जानबूझ के बदला ले बर मोहल्ला म एक समिति बनाके बहिष्कार करे के निरनय लेय हे।  जेखर सुनवाई सासन  घलो नइ करत हे।