सुरक्षाबल बल ल मिलिस बड़का कामयाबी … मुठभेड़ म 10 नक्सली ढेर..

बीजापुर. जिला के भैरमगढ़ थाना क्षेत्र  के माड़ के जंगल मन म सुरक्षाबल मन ह गुरुवार के बिहनियां होए मुठभेड़ म 10 नक्सली ल मार  गिराइस हे।  उंखर तीर ले कुल 11 हथियार घलो बरामद करे गिस। एखर पुष्टि पुलिस अधीक्षक अउ बस्तर के डीआईजी पी सुंदरराज ह करिस हे।  उमन बताइस के,  आज सुरक्षाबल मन के टीम ल बड़े कामयाबी मिलिस हे।

पुलिस अधीक्षक मोहित गर्ग ह बताइस के, डीआरजी, एसटीएफ अउ  पुलिस के संयुक्त टीम आज बिहनियां गश्त म निकले रहिस हे। जइसे ही ए टीम माड़ के जंगल म पहुंचिन उहां पहिली ले  घात लगाए नक्सली मन ह  उंखर उपर अंधाधुंध फायरिंग सुरू कर दीस। अचानक होए फायरिंग ले बिना घबराए जवान मन ह घलो जवाबी कार्रवाई करिन। एमा 10 नक्सली ढेर हो गिस। उहें उँखर कब्जा ले 11 हथियार बरामद करे गिस। सबो दस लाश मन ल बरामद करे जा चुके हे। सुरक्षाबल मन के दावा हे के, नक्सली मन के  तादाद अभउ अउ बढ़ सकत हे। मउका म  लगातार फॉयरिंग जारी हवय।