कोरकोट्टी नक्सली हमला के 10वीं बरसी म शहीद 29 जवान मन के शहादत ल करिन हे नमन
राजनांदगांव. पुलिस लाइन म शुक्रवार के कोरकोट्टी नक्सली हमला म शहीद जवान मन के शहादत के 10वीं बरसी म श्रद्धांजलि दे गिन। श्रद्धांजलि कार्यक्रम म जनप्रतिनिधि अउ पुलिस विभाग के अधिकारी, करमचारी शामिल होईन अउ शहीद मन ल भावभीनी श्रद्धांजलि अर्पित करिन हे। ये मौका म बड़े संख्या म पुलिस विभाग के अधिकारी-करमचारी मन ह रक्तदान घलो करिन।
बता देंन कि आज ले दस साल पहिली 12 जुलई 2009 के मानपुर थाना इलाका के कोरकोट्टी गांव के पास तत्कालीन पुलिस अधीक्षक विनोद कुमार चौबे सहित 29 पुलिस जवान ह नक्सली हमला म शहीद होगिन। उंखर शहादत ल याद करत शहीद मन ल नमन करे बर हर साल राजनांदगांव शहर के पुलिस लाइन म श्रद्धांजलि सभा के आयोजन करे जाथे। ये आयोजन म नक्सल हमला म शहीद जवानों के शहादत ल नमन करत शहीद के परिवार के सदस्य मन ल शॉल, श्रीफल भेंट करे गिन अउ देशभक्ति गीत के आयोजन घलो होईस। पुलिस विभाग ह शहादत के 10वीं बरसी म नक्सली मन ले डटके मुकाबला करे अउ नक्सल आतंक ल खतम करे के बात कहिन। श्रद्धांजलि सभा म शहीद विनोद चौबे के पत्नी रंजना चौबे ह कहिन कि जन भागीदारी ले नक्सली समस्या के हल निकाले जा सकत हे, आज नक्सली ह बैकफूट म चले गे हे।
