रायपुर । संविलियन के मामला म शुक्रवार के मुख्यसचिव के अध्यक्षता म बैठक होइस हे। जेमा ये तय करे गिस कि 16 मार्च के समस्त शिक्षाकर्मी संघ के पदाधिकारी मन के संग मंत्रालय म मुख्य सचिव बैइठक लेके संघ प्रमुख मन ले बात करही। शालेय शिक्षाकर्मी संघ के प्रांताध्यक्ष वीरेन्द्र दुबे के कहिना हे कि अब ये बैइठक आखरी होनी चाही। हमन ल संविलियन चाही। ये बात कोनो ले छिपे नइए। खुद मुख्यमंत्री ह घोषणा करे रिहिस हे। ओखर बाद बार-बार बैइठक म इहीं मुद्दा मन म चरचा करना समझ ले बाहिर हे।
हमन स्थाई समाधान चाहत हन। अउ सरकार ह सकारात्मक रुख रखके येही चाहत हे तव ये बैइठक ह आखरी होनी चाही। अउ संविलियन के घोषणा के संह आदेश जारी होवय। शिक्षक पंचायत ननि मोर्चा के उपसंचालक जितेन्द्र शर्मा अउ चन्द्रशेखर तिवारी ह जानकारी दीस कि 16 मार्च के मोरचा के समस्त प्रान्तीय संचालक मन ये महती बैइठक म शामिल होही। शिक्षक पंचायत मोरचा के समस्त प्रान्तीय संचालक संविलियन संग 9 सूत्रीय मांग ल लेके लगातार आंदोलन करत हवय। जेखर परिणामस्वरूप समस्या मन के निराकरण करे बर सरकार ह मुख्य सचिव के अध्यक्षता म हाईपावर कमेटी के निर्माण करे रिहिस हे, जेखर रिपोर्ट सौंपे के अवधि 5 मार्च ह समाप्त होगे हे।
