जशपुर। जिला म महिला मन गांव-गांव म पूर्न सराबबंदी करे के जिम्मा उठाए हे। जेखर बर आदिवासी महिला मन बाकायदा गांव म बैनर-पोस्टर लेके जुलूस निकाले रिहिन। अऊ हर घर म तलासी घलो लेत हें। असल म आबकारी बिभाग भारत माता वाहिनी के माध्यम ले सराब बिरोधी कार्यक्रम चलात हे। अभियान म आबकारी बिभाग के संग ही पुलिस बिभाग घलो सामिल हें।
आंगनबाड़ी कार्यकर्ता मन, बेतन म बढ़ोतरी के मांग ल लेके हड़ताल म
सूरजपुर जिला के आंगनबाड़ी कार्यकर्ता मन, बेतन म बढ़ोतरी के मांग ल लेके हड़ताल म हे। अऊ अपन मांग पूरा नइ होए तक हड़ताल जारी रखे के बात म अड़े हे। जिहां सूरजपुर प्रवास म आए नेता प्रतिपक्ष टीएस सिंहदेव ह पहुंच के आगनबाड़ी कार्यकर्ता सहायिका मन के हरताल के समर्थन करिस। उहें ओमन के काम के प्रसंसा करत मउजूद बेतन ल सम्मानजनक नइ बताइस।
मकान या भुइंया खरीदे बर चाहत हव त सावधान हो जावव
रायपुर म अगर आप मन मकान या भुइंया खरीदे बर चाहत हव त सावधान हो जावव। काबर कि, इहां आएदिन फर्जीवाड़ा आगू आत जात हे। ताज़ा मामला म दू सगे भाई मन बैंक म बंधक दुकान अऊ मकान के सउदा करके एक मनखे ल 57 लाख रुपए के चूना लगा दिस। पुलिस ह दूनों आरोपी मन ल गिरफ्तार कर ले हे। गिरफ्तार करे गे विनोद कुमार रमानी अऊ शैन्की रमानी कटोरातालाब के रहइया हे, उहें दूसर मामला म सिविल लाइन पुलिस ह भुइंया दलाल संतोष लसेल अऊ संतोष खंडेलवाल ल गिरफ्तार करे हे।
लेडी अफसर महिला मन बर बन चुके मिसाल
बिलासपुर पुलिस के लेडी अफसर महिला मन बर मिसाल बन चुके हे। जोन ह हमेसा ले छात्रा अऊ महिला मन बर अपन सेवा दे बर तत्पर होथे। इही कारन हे कि बिलासपुर पुलिस के एडिसनल एसपी अर्चना झा ह लघु फिलिम के माध्यम ले जागरूकता लाए बर अहम किरदार निभाए हे। कन्या भ्रूण हत्या अऊ लैंगिक परीक्षन के अपराध ल देखत हुए बिलासपुर पुलिस ह लोगन मन म जागरूकता लाए बर अजन्मी नाम के लघु फिलिम बनाए हे। जेकर बहुत सराहना करे जात हे।
सीएम रमन सिंह ह महिला मन ल बड़े सउगात दे हे
रायपुर म अंतर्राष्ट्रीय महिला दिवस उपर सीएम रमन सिंह ह महिला मन ल बड़े सउगात दे हे। रमन सिंह ह प्रधानमंत्री मातृवंदना योजना ल जम्मों 27 जिला म लागू करे के ऐलान करे हे। जेखर ले गर्भवती महिला मन ल तीन किस्त म पांच हजार रुपिया दे जाही। एखर बर रमन सरकार ह बजट म 100 करोड़ रुपिया के प्रावधान करे हे। कार्यक्रम के दउरान ओहर कहिस कि अंतर्राष्ट्रीय महिला दिवस दुनिया म महिला ससक्तिकरन अऊ महिला मन के स्वाभिमान के प्रतीक बन गे हे। अऊ संग म कहिस कि सरकार ह महिला ससक्तिकरण के दिसा म पाछु 14 बछर म कई सार्थक कदम उठाए हे। महिला दिवस के मउका म सीएम आवास ले महिला मन के बाइक रैली घलो निकाले गिस।
