धमतरी म 47 किसान मन ल नई होइस धान के भुगतान

धमतरी म किसान मन के17 लाख रुपिया बकाया

धमतरी. जिला म एक कोती सरकार चारों दिसामन म कर्ज माफी के ढोल पीटत हवय अउ वोट मांगत हे, उहें दूसर कोती हालात ये हवय के, अभउ तक किसान मन ल धान के भुगतान नई हो सकीस हे. मामला धमतरी ले लगे आमदी नगर पंचायत के हे.

धमतरी ले लगे आमदी नगर पंचायत के किसान मन ह जनवरी माह म अपन फसल सरकारी सोसायटी म बेचे रिहिस हे. अब मार्च के महीना घलो खत्म होवइया हे, लेकिन अभु तक किसान अपन धान के भुगतान नई पाए हे.

गांव म अइसे एक-दू नई बल्कि 47 किसान हे, जेखर 17 लाख रुपए बकाया हे. ये बीच ये किसान मन ह कई बार प्रशासन ले घलो गुहार लगाइस, लेकिन नतीजा सिफर रिहिस हे.

अब ये किसान अपन परिवार चलाए अउ खेती करे बर फेर कर्ज ले बर मजबूर होगे हे उहें कलेक्टर ह ये किसान मन के समस्या जल्द दूर करे के बात कहिन हे.