corona: प्रदेश म बीते 24 घंटा म मिले हे कोरोना के 1964 नवा मामला, राजधानी म घलो 138 पाजिटिव
जय जोहार…. छत्तीसगढ़ म बीते 24 घंटा म कोरोना (corona) के 1964 नवा मरीज ह सामने आय हे। उहचे 1749 मरीज मन ल बने होय के बाद अस्पताल ले डिस्चार्ज कर दे गे हे। जबकि इलाज के दौरान 6 लोगन मन के मौत हो गे हे।
सनिच्चर के जेन कोरोना (corona) के नवा मरीज मिले हे, ओमा कोरबा ले 238, जांजगीर-चांपा ले 225, रायगढ़ ले 193, रायपुर ले 138, राजनांदगांव ले 113, दुर्ग ले 60, बालोद अऊ कबीरधाम ले 88-88, बेमेतरा ले 31, धमतरी ले 62, बलौदाबाजार ले 64, महासमुंद ले 36, गरियाबंद ले 59, बिलासपुर ले 98, मुंगेली ले 48, गौरेला-पेंड्रा-मरवाही ले 15, सरगुजा ले 42, कोरिया ले 57 नवा मरीज शामिल हे।
बता देन कि प्रदेश म कोरोना (corona) संक्रमित मन के संख्या ह बाढ़ के 1 लाख 87 हजार 270 पहुंच गे हे। जेमा ले 22 हजार 090 एक्टिव मामला हे। उहचे 1 लाख 63 हजार 079 लोगन मन ह कोरोना ले जंग जीत गे हे, जेखर बाद ओ मन ल अस्पताल ले डिस्चार्ज कर दे गे हे। जबकि ए वायरस ले प्रदेश म अब तक 2101 लोगन मन के मौत हो गे हे।
