टेंशन ख़तम ,रुद्रा सिनेमा ह छत्तीसगढ़ म खोलही दू सौ सिनेमाघर , दू हजार चौबीस म हो जाहि पूरा लक्ष्य

दीपक बावनकर@रायपुर  छत्तीसगढ़ी सिनेमा के निर्माता निर्देशक मन के एक बहुत बड़े समस्या खतम हो जाहि तईसे लागथे ,काबर कि सिनेमाघर के व्यवसाय करैय्या रुद्रा सिनेमा ह फेसबुक पेज म ये जानकारी दे हे की चार चरण म वो ह छत्तीसगढ़ म 200 सिनेमाघर के निर्माण करही

जेमा पहिली चरण म पचास सिनेमाघर बनाए जाही , खबर सुने अऊ पढ़े म बने लागिस लेकिन रुद्रा सिनेमा ल एखर बर  कई ठन शासकिय प्रक्रिया ले दू चार  होय ल लगही , अगर ओला इन्हा के फिलिम निर्माता मन के सपोर्ट   मिलही त कोई बात बन सकथे ,बहरहाल मंजिल अभी दूरिहा हे लेकिन ये समाचार ले शुभ सन्देश के महक जरूर आवत हे

जानकारी के अनुसार छत्तीसगढ़ के रतनपुर ,कटघोरा ,तखतपुर ,अभनपुर ,भानुप्रताप पुर ,नारायणपुर , कोमाखान , डोंगरगाँव,डोंडीलोहारा,गंडई,पाटन ,खैरागढ़ ,लोरमी , खरोरा ,चारामा ,नगरी ,आरंग , भटगांव ,पामगढ़ ,बालको , सीपत ,चंद्रपुर ,पिथौरा ,सिमगा अऊ केशकाल चिन्हित हे