30 हुक्का बार म पुलिस के छापा, ए हालत म मिलिस नाबालिग मन

रायपुर । छत्तीसगढ़ के राजधानी म बेखउफ हो के संचालित होवत हुक्का बार मन म पुलिस ह छापामार कार्रवाई करिस हे। पुलिस के दस अलग-अलग टीम ह बीते बुधवार- गुरूवार के रात म एक संग 30 हुक्का बार म छापा मारिस। देर रात तक चले छापा के कार्रवाई के दउरान छह हुक्का बार म 15 नाबालिग व छात्र हुक्का गुड़गुड़ात मिलिन। पुलिस ह हुक्का बार के मालिक, मैनेजर अउ कर्मचारी मन के खेलाफ कार्रवाई करिन।

छापामार कार्रवाई के दउरान पकड़े गे नाबालिग व छात्र मन के पालक मन ल  बुलवाय गिस। एखर बाद पुलिस ह उमन ल समझाइस देके छोड़ दिस। रायपुर के एडिशनल एसपी ग्रामीन सुखनंदन राठौर ह बताइस के हुक्का बार म नाबालिग अउ छात्र मन ल प्रवेस दिलाए के सिकायत मिले रहिस हे। कोतवाली व तेलीबांधा पुलिस थाना ले 55 पुलिस कर्मी मन के संग  राजेंद्र नगर, डीडी नगर, पंडरी, कोतवाली, तेलीबांधा थाना प्रभारी  मन ह एक संग सहर के 30 हुक्का बार म दबिस दीन।

पुलिस के टीम  ल मउका म नाबालिग अउ छात्र मन  हुक्का पीयत हुए मिलिन।  उहें  ग्राहक मन ल शराब बीयर घलो परोसे जात रहिस हे। पुलिस ह दस नग हुक्का सेट, पाइप, अलग-अलग फ्लेवर के ढेर सारा तंबाखू के पैकेट, 20 बोतल बीयर समेत अन्य सामाग्री जब्त करिस हे।  मामला म हुक्का बार के मालिक, मैनेजर, कर्मचारी मन उपर कार्रवाई करे गिस।