7 प्रोफेसर अऊ एक स्टूडेंट.. वहू फेल.. कहां के आए मामला पढ़व खबर

रायपुर. एक विषय बर सात झन प्रोफेसर हे अऊ एक झन स्टूडेंट.. फेर परीक्षा के परिणाम अईसे आईस के वहू फेल हो गे। दरअसल पं. रविशंकर शुक्ल विश्वविद्यालय म एमफिल बर पढईया नई मिले के कारण ए साल कई अध्ययन केन्द्र म ए कोर्स ल बंद कर दे गे हे।

नवा मामला एमफिल कंप्यूटर साइंस के हरे। वार्षिक परीक्षा मार्च-अप्रैल 2019 म होए रिहिस जेमा एक परीक्षार्थी ह शामिल रिहिस। ए परीक्षा के परिणाम मंगलवार के दिन जारी करे गिस, जेन ह चौकाने वाला हे। एम फिल कंप्यूटर साइंस म सिरिफ एक परीक्षार्थी रिहिस फेर पढ़ाई करईया प्रोफेसर नियमित अऊ संविदा मिला के सात हे। अतेक फैकल्टी होए के बाद भी सिरिफ एक परीक्षार्थी ल पास कराए म सफलता नई मिल पाईस। अईसे म रविवि ल जीरो प्रतिशत म परिणाम घोषित करे ल पड़िस।

एखर अलावा रविवि ह पीजी डिप्लोमा इन क्रिमि. एंड फॉरेन साइंस मई-जून सेमेस्टर 2019 परीक्षा के परिणाम घलो जारी करे हे जेमा शत-प्रतिशत परिणाम हाबे। उहें पीजी डिप्लोमा इन रिजनल प्लानिंग एंड डेवलपमेंट सेमेस्टर एग्जाम मई-जून 2019 म भी परिणाम शत प्रतिशत हे। संगे-संग बीबीए सेमेस्टर फोर मई-जून सेमेस्टर 2019 के परिणाम घलो जारी करे गिन जेमा 91.68 परीक्षार्थी उत्तीर्ण होए हे। एमपीएड, सीबीएस अऊ बी फार्मेसी के घलो रिजल्ट निकलिस हे।