घायल के जान बचाने वाला ट्रैफिक जवान ल एसपी मिश्रा करिस सम्मानित …. पढ़व अऊ खबर

रायपुर। अपन वरदी के परवाह न करत हुए सड़क म गिरे लहुलूहान सायकिल सवार ल उठाके उंखर मदद करने वाला यातायात पुलिस के जवान ल आज एसपी अमरेश मिश्रा ह प्रशंसा पत्र अउ नवा वर्दी देके सम्मानित करिस हे।
बता दन कि रविवार 18 मार्च के स्वर्ण जयंति तिराहा के पास थाना यातायात के आरक्षक देव सिंह यातायात डयूटी पर रहि हे। इंही दउरान ओ मेर ले गुजरत सायकल सवार सुरेंद्र छुरा ह बीच सड़क म अचानक गिरके बेहोश होगे। ओखर नाक ले खून बहे लगिस, जेला देख के ड्यूटी म तैनात आरक्षक देव सिंह तत्काल घायल सुरेंद्र के पास गिस अउ अपन वरदी के खराब होय के ख्याल न करत हुए घायल के मदद करे बर ओला अन्य लोगन के सहयोग ले उठाके सड़क किनारे लाइस। अउ बिना समय गंवाए तत्काल संजीवनी 108 ल फोन करके बुलाइस हे। अउ घायल व्यक्ति ल इलाज बर अस्पताल रवाना करिस।
पुलिस नाकाबंदी म एक गांजा तस्कर गिरफ्त म कार्यकर्ता मन प्रदर्सन करिन
जशपुर। एसपी प्रशांत सिंह ठाकुर के निर्देस म जम्मों थाना के पुलिस अवैध सराब के तस्करी रोके म लगे हे। ये कड़ी म फरसाबहार पुलिस के नाकाबंदी म एक गांजा तस्कर गिरफ्त म आइस। गांजा तस्कर ओड़िशा के सीमावर्ती करमडीह ले गांजा के तस्करी करत रिहिस। पम्पशाला म स्टेट हाइवे उपर जब बाइक म बंधे प्लास्टिक के बोरी के तलासी ले गिस, तब 2-2 किलो के 5 पैकेट गांजा मिलिस। जेकर बाजार म कीमत 55 हजार आंके जात हे। पुलिस ह पानबहार निवासी भगवानो यादव ल गिरफतार कर ले हे, अऊ पूछ-ताछ कर त हे।
विधान मिश्रा के नाव के बिरोध म
रायपुर। बिधानसभा चुनई ल लेके जोगी कांग्रेस ह अपन उम्मीदवार मन के तीसर लिस्ट जारी कर दे हे। पार्टी ह अपन 10 उम्मीदवार मन के ऐलान करे हे। जेमें अजीत जोगी राजनांदगांव, देवव्रत सिंह- खैरागढ़,योगेश तिवारी, बेमेतरा, विधान मिश्रा धरसिंवा, हृदय राम राठिया लैलूंगा ले उम्मीदवार होही। उहीं जोगी कांग्रेस ह धरसींवा ले विधान मिश्रा ल अपन उम्मीदवार घोसित करे हे, जेकर बाद पार्टी कार्यालय म बिवाद सुरु हो गिस। पन्नालाल साहू के कार्यकर्ता मन विधान मिश्रा के नाव घोसित होए के बिरोध करत प्रदर्सन करिन, अऊ पार्टी उपर पिछड़ा वर्ग ल अनदेखी करे के आरोप लगाइन।
महावीरगंज धान उपार्जन केंद्र म एक बोरा धान घलो नइ हे …मामला दर्ज
बलरामपुर। जिला के धान उपार्जन केंद्र महावीरगंज सुरु ले ही बिवाद ले घिरे हे। ये दरी घलो खरीदी पुरा होए के बाद आखिरी उठाव ले पहिली 2 हजार 168 बोरी धान कम पाए गिस। मामला के खुलासा तब होइस जब अम्बालिका राइस मिल सूरजपुर के संचालक 22 अऊ 24 फरवरी के डीओ लेके 1 हजार 456 क्विंटल धान उठाव बर महावीरगंज पहुंचिस। घोटाला के खबर लगत ही प्रसासन के नींद उड़ गिस। आनन-फानन म भौतिक सत्यापन बर प्रसासनिक टीम गठित करके मउका के निरीक्षन करे गिस तब पता लगिस, कि फील्ड म एक बोरा धान घलो नइ हे। जबकि रिकॉर्ड म 2 हजार 268 बोरा धान उठाव बर सेस दिखाए जात रिहिस। जांच के दउरान जम्मों कर्मचारी नदारद रिहिन। जांच टीम ह मउका म पंचनामा तैयार करके जिला प्रसासन ल जानकारी दिस। उहीं प्रतिवेदन के आधार म कलेक्टर अवनीश शरण ह एला बित्तीय अनियमितता मानिस, अऊ प्रकरन ल गंभीरता ले लेत सहायक पंजीयक बलरामपुर ल मामला दर्ज करके कार्रवाई करे के आदेस दिस।
प्रधान आरक्षक ह सारीरिक परीक्षा म दउड़त बेरा गिर गिस….मउत
भिलाई। नगर म रविवार के सारीरिक परीक्षा पास करे बर बिहिनिया ले दउड़त सुपेला थाना म पदस्थ प्रधान आरक्षक के मउत हो गिस। प्रधान आरक्षक ह सेंट्रल एवेन्यू म दउड़त बेरा अचानक गिर गिस, फेर ओला उपचार बर सेक्टर 9 अस्पताल ले जाए गिस। जिहां डॉक्टर मन ओला मृत घोसित कर दिन। असल म पुलिस बिभाग म प्रधान आरक्षक के सहायक उपनिरीक्षक ‘आ’ वर्ग के फिजिकल परीक्षा बर 5 किलोमीटर के दौड़ कराए जात रिहस। प्रधान आरक्षक के मउत के खबर सुनत ही पुलिस महकमा म हड़कंप मच गे। मउत के सूचना मिलत ही परीक्षा रद्द कर दे गिस।