कवर्धा। छत्तीसगढ़ के कबीरधाम जिले के भोरमदेव अभ्यारण म प्रस्तावित टाइगर प्रोजेक्ट के निर्णय ल राज्य सरकार हनिरस्त कर देहे हे।छत्तीसगढ़ सरकार के वन मंत्री व कबीरधाम जिला के प्रभारी मंत्री महेश गागड़ा ह सोमवार के बोडला विकासखण्ड के ग्राम पंचायत झलमला म आयोजित विकास सम्मेलन ल संबोधित करत हुए ये जानकारी दीस। उमन कहिन कि राज्य सरकार ह वनांचल म रहय्या लोगन मन के हित मन अउ उंखर विकास ल ध्यान म रखत हुए ये फैसला लिस हे। अब भोरमदेव अभ्यारण के वन ग्राम अउ वनाचंल के कोनो गांव ल टाइगर प्रोजक्ट के नाम म व्यवस्थापन नइ करे जाहीं।
दिव्यांग आवेदक मन ल कलेक्टर ह भेंट करिस सहायक उपकरण
धमतरी कलेक्टर डॉ. प्रसन्ना ह दिव्यांग सहायता केन्द्र म जाके दिव्यांग आवेदक मन के आवेदन लिस अउ समुचित कार्रवाई बर उप संचालक समाज कल्याण ल निर्देशित करिन। ये दउरान उमन ह कुरूद के ग्राम चटौद ले आए दिव्यांग रोहित कुमार साहू, ग्राम भोथली के गुलहेदराम अउ धमतरी के ग्राम कलारतराई के वृद्ध कार्तिकदास ल श्रवण यंत्र प्रदान किरन। एकर संग स्थानीय रामपुर वार्ड के दिव्यांग गोविंदराम देवांगन ल मोटराइज्ड ट्रायसिकल भेंट करिन।
युवा मन के जोस अऊ बुजुर्ग मन के होस के दम म प्रदेस म सरकार बनाही : भूपेश
गरियाबंद जिला के दउरा म पहुंचे प्रदेश कांग्रेस अध्यक्ष भूपेश बघेल ह अवइया चुनई म जिला के दून्नो सीट उपर कब्जा जमाए के दावा करे हे। संग ही ओहर दावा करिस कि कांग्रेस युवा मन के जोस अऊ बुजुर्ग मन के होस के दम म प्रदेस म सरकार बनाही। भाजपा उपर मछुवारा समाज ल ठगे के आरोप घलो लगाइस। फेर ये दउरान पार्टी म कउनो भी तरह के गुटबाजी ले इनकार करत हे। भूपेश बघेल के सभा ले कई कार्यकर्ता चल दिन, जेकर कारन खाली कुर्सी दिखत रिहिस। एकर ले अंदाजा लगए जात हे कि पार्टी के एकजुटता गरियाबंद जिला म अच्छा नइ हे।
लोरमी थाना प्रभारी आनंदराम दउड़त दउड़त गिर गिस
मुंगेली जिला के प्रवास म गे बिलासपुर आईजी दीपांशु काबरा ह पुलिस लाइन अऊ थाना मन के निरीक्षन करिस। संगे संग पुलिस परेड के सलामी लिस। एकर बाद जिम के उद्घाटन घलो करिस। इही दउरान आईजी जब जिला के जम्मों थानेदार अऊ सिपाही मन ल फिटनेस चेक करे बर दउड़ लगवाइस, तभे लोरमी थाना प्रभारी आनंदराम दउड़त दउड़त गिर गिस। जेकर चलत आईजी ह फिटनेस म ध्यान देए के नसीहत दिस। आप मन ल बता दन कि ये दउरान आईजी ह रक्षा टीम, महिला कमांडो ले भेंट करिन अउ मुंगेली पुलिस के प्रसंसा करिस।
सरकारी बिभाग उपर 73 लाख रुपिया के बिजली बिल बकाया
कांकेर म सरकारी बिभाग उपर 73 लाख 43 हजार 620 रुपिया के बिजली बिल बकाया हे, अऊ ये बकाया ल वसूले म अब बिभाग के पसीना छूटत हे। संग ही बिजली बिभाग के सबले बड़े बकायादार आदिम जाति कल्याण बिभाग हे। जिहां अभु घलो 14 लाख 11 हजार 711 रुपिया के बिल बकाया हे। उहें बिजली बिभाग ह जम्मों झन ले नोटिस जारी करके जल्दी ले जल्दी बकाया बिल चुकाए बर कहे हे।
कांग्रेस नेता एक दिन के उपवास म बइठिस …
राहुल गांधी के निर्देश म छत्तीसगढ़ में कांग्रेस नेता मन एक दिन के उपवास म बइठिस। कांग्रेस के उपवास ल लेके छत्तीसगढ़ कांग्रेस प्रभारी पीएल पुनिया ह कहिस कि बीजेपी खाली कांग्रेस ल फॉलो करे म लगे हे। पूरा बीजेपी सरकार पहिली हमर पदयात्रा अऊ अब हमर उपवास के नकल करत हे। दू अप्रैल के भड़के हिंसा बर खाली बीजेपी सरकार जिम्मेवार हे… आप मन ल बता दन कि रायपुर म कांग्रेस के एक दिवसीय उपवास म पीएल पुनिया, भूपेश बघेल, धनेन्द्र साहू, सत्यनारायण शर्मा, डॉ. शिवकुमार डहरिया, करूणा शुक्ला, अऊ पी.आर. खुंटे सामिल होइन। उहें प्रभारी सचिव डॉ. अरूण उरांव कांकेर म, प्रभारी सचिव चंदन यादव बिलासपुर म, डॉ. चरणदास महंत अऊ रामदयाल उइके कोरबा म, रविन्द्र चौबे बेमेतरा म, उमेश पटेल रायगढ़ म अऊ छाया वर्मा जांजगीर-चांपा म सामिल होइन।
