जय जोहार. अपन फिल्मी कैरियर के शुरुआत म ही तीन अलग-अलग तरह के फिलिम करईया आहना फ्रांसिस अब सबो ल हैरान करे बर एक्शन अवतार म आने वाली हे। अहाना फ्रांसिस प्रोड्यूसर सीके साहू अऊ डायरेक्टर धर्मेंद्र चौबे कृत फिलिम बही तोर सूरता म… से पॉपुलर हो चुके हे। हालांकि ऐ फिलिम म अहाना ह सेकंड लीड म रिहिस लेकिन प्रोड्यूसर अनुराग साहू अऊ डायरेक्टर उत्तम तिवारी ल ऐखर काम अतेक सुग्घर लागिस कि ओला राजा छत्तीसगढिया-2 म छॉलीवुड स्टार अनुज शर्मा के अपोजिट मुख्य किरदार कास्ट कर लिन। एखर बाद आहना ह फिल्म बेर्रा म घलो प्रमुख भूमिका म नज़र आईस।
डायरेक्टर एज़ाज़ वारसी कृत बेर्रा, अहाना के पहिली फिलिम रिहिस जिहां ले ऐ ह छॉलीवुड म अपन कदम रखिस। दर्शक मन ल अपन अदा अऊ चंचलता ले लुभाने वाली अहाना ओ पहिली हिरोईन हरे जेन ह पिछले डेढ़ साल म 8 छत्तीसगढ़ी फिलिम, एक भोजपुरी फिलिम, छत्तीसगढ़ी डाक्यूमेंट्री, हिंदी एल्बम अऊ रियलिटी शो में काम कर चुके हे। अपन आगू अवईया फिलिम कोयला, आशिक छत्तीसगढ़िया -एक प्रेम कहानी, बंद गईल पिरितिया के डोर (भोजपुरी), त्रिवेणी, अंधियार और कहर म बतौर मुख्य किरदार निभात नजर आहि।
जय जोहार ले चर्चा के बेरा म अहाना ह अपन सफलता के श्रेय डायरेक्टर एज़ाज़ वारसी ल दिस। अहाना ह कहिन कि एज़ाज़ सर ओखर कला ल पहचाने अऊ आगू बढ़े में अब्बड़ साथ देहे। अहाना के ऐ सफर म गज्जू मिश्र अऊ मनोजदीप के घलो बड़े योगदान हाबे, जेखर सति छत्तीसगढ़ी फिल्म इंडस्ट्री म अलग पहचान बनाए म मदद मिलिस।
अहाना ह कहिन कि मोर माँ के सपना हे कि एक दिन ओहा मोला बड़ा परदा म देखे। बहन एंजलीना फ्रांसिस ह ऐ सफर म मोला हमेशा आगू बढ़ाए बर प्रेरित करिस। रद्दा म मुश्किल त बहुत रिहिस फेर मोर बड़े बहिनी ह मोला कभी हार माने बर नई दिस। अहाना ह बतईन कि मोर पापा बिलासपुर शहर म भाजपा के पार्षद हे, वहू ह हमेशा मोर काम ल सराहिन अऊ मोला आगे बढ़े बर प्रेरणा दिन। में अपन काम ले अब्बड खुश हों अऊ में ह फेर अईसन फिलिम करना चाहथों जेमा मोर किरदार ह बिलकुल अलग हो अऊ ऑफ ऑफ बीट मूवी हो। फिल्म अब मोर जिनगी के अहम हिस्सा बन चुके हे।
