” पानी बर फुटिस किसान मन के गुस्सा “….कारयपालन अभियंता, जल संसाधन ल ज्ञापन सउपिन

नवनीत शुक्ला, मुंगेली। आज मनियारी जल संसाधन बेभाग मुंगेली म पथरिया अउ मुंगेली ब्लॉक के लगभग 100 किसान मन अपन समस्या ल ले के कारयपालन अभियंता, मनियारी जल संसाधन वेभाग ल ज्ञापन देहे बर पहुंचीस । येखर संग एसडीएम ले घलो मिलके समस्या के निवारन करे के मांग करिन।
लगभग डेढ़ महीना पहिली नहर ले पानी छोड़ेगे रहिस । 50 दिन बाद घलोक नहर डी2 म पानी के आपूरती आखरी छोर तक नहीं होवत हे । जेखर कारन फसल सुखाय के नवबत आवत हे । अउ किसान मन के कोनो सुनवाई तक नइ होवत हे । जेखर कारन गुसियाय किसान मन आज कलेक्टरेट म नारा बाजी करत ज्ञापन दिस। एला बेभागिय लापरवाही कहे जाय या काम म उदासीनता ?
कई पइत अवगत कराय के बाद घलो नहर बेभाग ह नहर के मरम्मत म कोनो ध्यान नइ देवत हे । जेखर परिनाम ये होवत हे कि आज जब किसान ल पानी के जरूरत हवय तब पानी नइ मिल पात हे। करोड़ के लागत म बने नहर आज रख रखाव के अभाव म दम तोड़त जात हे। मिले जानकारी म राजीव गांधी जलासय म लगभग 25 फीसदी पानी बचे हवय । अउ अभउ बेरा ल देखत हुये पानी के जरूरत पढ़ ही । येती हर साल पथरिया ब्लॉक म किसान मन ल सरकारी रवइया ले त्रस्त हो के अपन जिनदगी ले हताश होय बर पड़थे । अब देखना हे बेभाग ह का कदम उठावत हे ।
0 ” पानी के समस्या ल लेके पथरिया ब्लॉक के लगभग 100 किसान आज आय रहिन हे , जेखर समस्या मन ल देखते हुए डी1 अउ डी3 म रोक के डी2 म पानी देय जाही।” एसडीएम मुंगेली