ईवीएम मसीन के पहरेदारी करइया कांग्रेस कार्यकर्ता के मउत… मामला दर्ज

जशपुर। स्ट्रांग रूम के बाहिर पहरेदारी करइया कांग्रेस कार्यकर्ता के मउत हो गिस। मउत के वजह अभउ तक स्पष्ट नइ हो पाईस हे । पुलिस  ह मामला दर्ज कर लिस । मामला के जांच जारी हे। पोस्टमार्टम रिपोट के बाद मउत के सही वजह  आघू आही।

मिले जानकारी म कुनकुरी विधानसभा क्षेत्र के कांग्रेसी कार्यकर्ता 30 बछर के  पंकज मिंज जशपुर के स्ट्रांग रूम म कांग्रेस प्रत्यासी यूडी मिंज अउ उंखर समर्थक मन के संग ईवीएम के रखवाली म लगे रहिस । शनिवार के दुपहर करीब 2 बजे अचानक उंखर तबियत बिगड़िस। ओला आनन फानन म  जिला अस्पताल जशपुर लाय गिस । जिहां ओखर हालत गंभीर देखत हुए डॉक्टर मन ह  अंबिकापुर रेफर कर दिस। जिहां आज तड़के करीब 3 बजे उंखर मउत हो गिस। कांग्रेस जिलाध्यक्ष पवन अग्रवाल ह पंकज के मउत के पुष्टि करिस हे। मृतक पंकज कुनकुरी के कलीबा गांव के रहइया बताय जात हे।