बीती रात म 16 गाड़ी मन ल आग के हवाले कर दिस नक्सली मन …..मजदूर मन ल बंधक बनाइन

कांकेर। ऑपरेशन प्रहार-4  ले घबराए नक्सली मन  दक्षिन बस्तर छोड़ के पूर्वी छत्तीसगढ़ के ओर कूच करत हे । बीती रात म नक्सली मन ह  महाराष्ट्र सीमा ले सटे एटापली म सड़क निरमान म लगे 16 गाड़ी मन ल आग के हवाले कर दिस।  संगे-संग काम म लगे मजदूर मन ल घलोक देर रात तक बंधक बनाके रखे रहे के  बात के खुलासा होइस हे।

एटापली के गतेपल्ली म सड़क निरमान कार्य के काम जारी हवय।  ए दउरान काफी संख्या म नक्सली मउका म पहुंचिन। उमन ह काम म लगे 10 जेसीबी मसीन, 5 ट्रैक्टर अउ एक टिप्पर वाहन ल आग के हवाले कर दिस।  नक्सली मन ह एखर संग ही काम म लगे मजदूर मन ल  देर रात बंधक बना के रखे रहिन हे।

नक्सल वारदात के बाद ले ही सुरक्षाबल अलर्ट म हे।  इलाका म लगातार सर्चिंग तेज कर दीस हे।  संगे-संग अन्य इलाका मन म भी जवान मन ल अलर्ट कर दे गिस हे। पुलिस ह मामला दरज कर जांच-पड़ताल सुरू कर दीस हे।   पुलिस ल अब तक कोनो सुराग नइ मिलिस हे।