नगर पंचायतअभनपुर के दू अधिकारी निलंबित

रायपुर। नगरीय प्रसासन अउ विकास विभाग के अन्तरगत नगर पंचायत अभनपुर के दू अधिकारी-प्रभारी मुख्य नगर पालिका अधिकारी अनिल कुमार शर्मा अउ उप अभियंता सुरेश गुप्ता  ल राज्य सासन  ह तत्काल प्रभाव ले निलंबित कर दिस हे। ए आसय के आदेस 2 जनवरी 2019 के मंत्रालय (महानदी भवन) रायपुर म जारी करे गिस।  निलंबन अवधि म श्री शर्मा अउ श्री गुप्ता के मुख्यालय कार्यालय संयुक्त संचालक नगरीय प्रसासन अउ विकास, क्षेत्रीय कार्यालय रायपुर नियत करे गेहे।

ए दूनों अधिकारी ल नियमानुसार जीवन निर्वाह भत्ता के पात्रता होही। उल्लेखनीय हे के नगर पंचायत अभनपुर के प्रभारी मुख्य नगर पालिका अधिकारी अनिल कुमार शर्मा अउ उप अभियंता सुरेश गुप्ता ल एन्टी करप्शन ब्यूरो  ह रिश्वत लेने के आरोप म गेरफ्तार कर न्यायिक अभिरक्षा म जेल भेज दिस। ए वजह ले, राज्य सासन ह छत्तीसगढ़ नगर पालिका कर्मचारी (भर्ती तथा सेवा शर्ते) नियम के तहत निलंबित करिस हे।