सत्यनारायण, धनेन्द्र या फेर अमरजीत बनही प्रदेश कांग्रेस अध्यक्ष… जाति समीकरन म भगत आघू

रायपुर। छत्तीसगढ़ म कांग्रेस अउ बीजेपी के प्रदेस अध्यक्ष के पद खाली हे, जेखर बर नवां नेता के चुनाव करे जाही। लेकिन अभु तक दूनों ही पार्टियां अपन प्रदेस अध्यक्ष के चुनाव नह कर पाय हे।

कांग्रेस ह प्रदेस अध्यक्ष के चुनाव ल लेके अपन तइयारी सुरू कर दे हे। एखर बर  पाछू के दिन म छत्तीसगढ़ आए कांग्रेस प्रदेस प्रभारी पीएल पुनिया ह पार्टी के सबो पदाधिकारी मन ले चरचा करे हे। एखर संगे-संग कुछु नेता मन ह दिल्ली जाके कांग्रेस के राष्ट्रीय अध्यक्ष राहुल गांधी ले मुलाकात करिन अउ प्रदेस अध्यक्ष के नाम ल लेके चरचा करिन हे।

जल्द ही प्रदेस अध्यक्ष के ऐलान : रविंद्र चौबे

 ए संबंध म  मंत्री रविंद्र चौबे के कहिना हे के  थोड़कन दिन के बाद  प्रदेस अध्यक्ष के नाम के ऐलान होही। एखर बर प्रक्रिया सुरू हो गेहे। चौबे ह बताइस के जिहां एक ओर पीएल पुनिया ह इहां सबो वर्ग मन ले  चरचा करे हे, उहें दूसर ओर दिल्ली म भी कुछु लोगन मन ह राहुल गांधी ले मुलाकात कर ए विषय म चरचा करे हे।  रविन्द्र चौबे के मानन त कुछु दिन के बाद ही प्रदेस म कांग्रेस केअध्यक्ष के नाम के ऐलान करे दे जाही।

अमरजीत दउड़ म सबले आघू

पहिली कांग्रेस प्रदेश अध्यक्ष के दउड़ म चरणदास महंत, धनेंद्र साहू अउ सत्यनारायण शर्मा के नाम सुरखी म रहिस हे। लेकिन चरणदास महंत ल विधानसभा अध्यक्ष बना दे गिस। ए सूची म धनेंद्र साहू अउ सत्यनारायण शर्मा के नाम म चरचा करे जात हे। ए घलो खबरें हे के जाति समीकरन ल देखत हुए अमरजीत भगत के नाम प्रदेश अध्यक्ष बनाए जाए के दउड़ म सबले ऊपर हे।

आवइया दिन म लोकसभा चुनाव घलो होवइया हे अउ ओमा कांग्रेस प्रदेस अध्यक्ष के भूमिका काफी अहम रहही। कांग्रेस के हाईकमान प्रदेस पार्टी के कमान काला सउप ही ए देखे वाले बात होही।