ए ट्रेन म मवजूद यात्री मन के संग बड़ हादसा होत-होत बचिस…… वजह जानव

बिलासपुर । आज बिहनिया हरिद्वार उत्कल एक्सप्रेस पेंड्रा रोड ले खोंगसरा के ओर रवाना होइस हे। तभे कटनी ले बिलासपुर अवइया ए ट्रेन म मवजुद यात्री मन के संग बड़ हादसा होत-होत बचगे।  दरसल खोंगसरा के आसपास तइनात गैंगमैन के निगाह जांच के दइरान ट्रैक म पड़ीस, ट्रैक म दरार साफ दिखाई देवत रहिस हे, गैंगमैन ल जानकारी रहिस के, थोड़कन देर म ए ट्रैक ले उत्कल एक्सप्रेस गुजरइया हे। एखर सेती  उमन ह बिना वक्त गवाएं तुरंतेच एखर सूचना अधिकारी मन पहुंचाए के संग अपन कोसिसि म क्रैक ट्रैक के  पहिली ही लाल झंडी दिखाके उत्कल एक्सप्रेस ल रोक दिस।

जांच म पता चला हे के रेल पटरी म ठंड के वजह ले बड़ क्रैक आ गे रहिस हे, जेमा अगर ट्रेन गुजरतीस त बड़ रेल हादसा मुमकिन रहिस हे। जाहिर हे के गैंगमैन के सतर्कता ले एक बड़ रेल हादसा टल गिस। बाद म पटरी ल सुधार कर उत्कल एक्सप्रेस ल रवाना कर देय गिस।