एनटीपीसी म हादसा……. एक मजदूर के मउत…..9 मजदूर गंभीर रुप ले घायल

बिलासपुर। सीपत स्थित एनटीपीसी म आज बड़ा हादसा हो गिस। यूनिट 4 म लगे चिमनी म जबरदस्त विस्फोट हो गिस। जेला 9 मजदूर घायल होगे, उहें एक मजदूर के मउत हो गिस। एनटीपीसी प्रबंधन ह मजदूर मन ल इलाज बर प्राथमिक स्वास्थ्य केन्द्र लेके गिस।

मिली जानकारी म सीपत स्थित एनटीपीसी म बुधवार के यूनिट 4 म काम चलत रहिस हे।  तभे उहां लगे चिमनी म जबरदस्त विस्फोट होगे। आवाज सुनत ही मजदूर अपन जान बचाए बर इधर-उधर भागे लगिस। ए हादसा म 9 मजदूर गंभीर रुप ले घायल होगे।

एनटीपीसी प्रबंधन ह घलो घायल मन ल प्राथमिक स्वास्थ्य केन्द्र इलाज बर लेकर गे हे।  उहें एक मजदूर के मउत होए के जानकारी मिलिस हे। हालांकि अधिकारिक रुप ले एखर अभु पुष्टि नइ हो पाइस हे। एती मजदूर मन ह एनटीपीसी प्रबंधन उपर लापरवाही के आरोप लगात हुए हंगामा सुरु कर देय। हंगामा ल देखत हुए प्रबंधन ह सुरक्षा बल अउ स्थानीय पुलिस के तइनाती कर दे गेहे।

प्रत्यक्षदर्शी मन बताइस के, बुधवार के बिहनिया रोज के तरह ही काम चलत रहिस हे। तभे अचानक बॉयलर के बेस तेज आवाज के संघरा गिर गे। ए बेस 15 मीटर ऊपर बनाय गिस। उहें उंखर नीचे 9 श्रमिक काम म लगे रहिस हे। बेस के गिरत ही मजदूर ओखर के नीचे दबगे। मउका म चीख पुकार मच गिस। आनन-फानन म मजदूर मन ल बाहिर निकाले गिस। एखर  बाद उमन ल कोनो तरह अस्पताल पहुंचाय गिस।