पत्रकार मन ह सउपिन राज्यपाल के नाव ले ज्ञापन

रायपुर. रायपुर के भाजपा कार्यालय म पत्रकार मन ले करेगे मारपीट के विरोध म कोंटा के पत्रकार मन ह विरोध प्रदर्सन करत हुए एसडीएम ल राज्यपाल के नाम ज्ञापन सउपिन हे। राजधानी म पाछू दिन म पत्रकार मन के संग भाजपा कार्यकर्ता मन ह मारपीट करे रहिन हे।

ए घटना के बाद ले प्रदेस के पत्रकार मन विरोध करत हवय। जेला लेके राज्य भर म धरना प्रदर्सन जारी हवय। बीजापुर जिला मुख्यालय म पत्रकार बुधवार के भाजपा कार्यालय के आघू अनसन म बइठगे। अउ सुकमा जिला के कोंटा के पत्रकार मन ह घलो घटना के निंदा करत हुए एसडीएम ल ज्ञापन सउपिन हे। घटना के प्रति अपन विरोध प्रकट करत हुए राज्यपाल के नाम एसडीएम कोंटा ल ज्ञापन सउप दे हे।

जगदलपुर म घलो घटना के विरोध म एक दिवसीय धरना- प्रदर्सन करे गिस, उहें कोंडागांव अउ बीजापुर म जिला बंद के आह्वान करे गिस। एखर अलावा राज्य भर के अन्य जिला म  रइली निकाल के सांकेतिक धरना के माध्यम ले ए घटना के विरोध करे जात हे।

कोन्टा म ज्ञापन सउपे के दउरान पत्रकार बीएम राव समीर, किर्तिनियों, शेख मकबूल, मोहम्मद रफी, ओलम नागेंद्र, अंबाडी, देवेंद्र कुमार, पवन कुमार, मोहित सागर, तपन कुमार ठाकुर समेत अन्य पत्रकार मन मउजूद रहिन हे।