कर्जमाफी.. प्रदेश सरकार ह किसान संग करिस धोखा : पीएम मोदी

महागठबंधन ल बताइस  ‘महामिलावट’ …. कहिन… देस  के सेहत करही खराब

रायगढ़ । छत्तीसगढ़ दउरा म आए प्रधानमंत्री नरेंद्र मोदी ह छत्तीसगढ़ के कांग्रेस सरकार उपर हमला बोलत हुए कहिन के, कर्जमाफी के नाम म सरकार ह किसान मन के संग  बड़े धोखा करिस हे।

सरकार ह कहे रहिस हे के, दस दिन म सबो किसान मन के करजा माफ हो जाही। लेकिन, सिरिफ जिला सहकारी अउ ग्रामीन बैंक मन के करजा ही माफ करे गिस। सीबीआई उपर राज्य म प्रतिबंध लगाए म प्रधानमंत्री क कहिन के, सरकार जब कोनो गलत नइ करत हे त फेर सीबीआई ल ओला डर काबर लगत हे।

उमन कहिन के, कांग्रेस अभु ले ही अपन भ्रष्टाचार ल छुपाए म लग गेहे। प्रधानमंत्री नरेन्द्र मोदी शुक्रवार के छत्तीसगढ़ प्रवास रहिस हे। रायगढ़ जिला के कोड़ातरई म जनसभा ल संबोधित करत हुए पीएम नरेन्द्र मोदी ह न सिरिफ प्रदेस के नवां कांग्रेस सरकार उपर निसाना साधिस बल्कि लोकसभा चुनाव के पहिली बने महागठबंधन उपर घलो बिना नाम ले घेरे के कोसिस करिन।

महागठबंधन के जगा म उमन बार-बार महामिलावट के बात कहिन। एखर अलावा राष्ट्रीय कांग्रेस उपर घलो निलाना साधिस। पीएम नरेन्द्र मोदी ह महागठबंधन उपर निशाना साधत हुए कहिन के, मिलावट सबो के  सेहत बर खराब हे। गरीब आदमी घलो मिलावट ल पसंद नइ करय। उमन थोड़कन महंगा समान खरीदना पसंद करथे। लेकिन मिलावट नइ। जइसे अच्छा सेहत बर ​मिलावट गरीब ल घलो पसंद नइए। वइसने  देस के विकास बर मिलावट अच्छा नो हय। एखर ए महामिलावट ल रोकना होही।

पीएम नरेन्द्र मोदी ह कहिन के, हमर सरकार, गरीब मन के अउ  गरीब मन बर हे। एखर सेती गरीब मन बर कई योजना लागू करिस हे। देस के इतिहास म पहिली बेर कोनो योजना बने हे। अइसन लोग जेखर मासिक आय 15 हाजार रुपिया ले  कम हे, उमन ल 60 साल के उम्र के बाद 3 हजार रुपिया प्रति माह पेंसन दे जाही।

लोन प्रोसेस बर किसान मन ले जाए शुल्क ल समाप्त कर दे गेहे। एखर बर बैंकर्स एसोसिएसन ल बधाई देवत हव। अब तक देस के छोटे किसान मन ल बिना गारंटी के 1 लाख रुपिया तक के किसानी बर करजा मिलत रहिस हे, अब नवां निरनय म 1 लाख 60 हजार रुपिया तक के करजा बिना गारंटी के मिलही।