देर रात फायरिंग ले हड़बड़ाए लोग मन सोचिस नक्सली हमला…

कांकेर : नक्सल प्रभावित क्षेत्र के बांदे थाना के तीर बीती रात फायरिंग
ले पुलिस महकमा म हड़कंप मच गिस. उहें ए घटना ले कुछ देर बर आस-पास के
इलाका म दहसत फइल गिस. आस-पास के ग्रामीन मन बताइस के, देर रात फायरिंग
के आवाज सुन के उमन ल लगिस के नक्सली हमला होइस हे, लेकिन मामला कुछु अउ
ही निकलिस.

दरअसल, जिला के ही छोटे बेठिया क्षेत्र के एक युवती ल कुछु दिन मन ले
पहिली एक युवक भगा ले गिस. अउ बांदे थाना क्षेत्र म रहत रहिस हे. जब ए
बात के भनक लड़की के भाई ल लगिस तो वो अपन साथी मन के संग बांदे पहुंचिस.
जेला देख युवक-लड़की ल लेके उहां ले भागे लगिस. जेमा लड़की के भाई ह दूनों
के पाछू करिस. जेखर ले डर के युवक अउ युवती बांदे थाना के ओर भागे लगिस.
जेला देख नाइट ड्यूटी म तइनात जवान मन ह संदिग्ध समझ के पहिली चेतवानी
दीस, लेकिन युवक अ युवती नइ रुकिस. जेखर बाद जवान ह गोली चला दीस.

जवान के गोली सीधा युवक के कंधा म जा लगिस. एखर अलावा एक गोली लड़की के
भाई के पीठ के हिस्सा ल छूवत हुए निकल गे. फायरिंग के दउरान थाना के तीर
खड़े दू गाड़ी मन म घलो गोली लगिस हे. जेखर ले दूनो गाड़ी क्षतिग्रस्त हो
गिस.

बांदे थाना क्षेत्र म दहसत

देर रात होए फायरिंग ले पूरा इलाका म दहसत फइल गे रहिस. बिहनिया जब पूरा
मामला के खुलासा होइस तो लोगन मन राहत के सांस लीस. हालांकि सामने ले
कउन गोली चलाइस अउर कोन बन्दूक ले गोली चलिस हे, ह अभु तक पता नइ चल सकिस
हे. फिलहाल पुलिस पूरा मामला के जांच म जुट गेहे . फायरिंग म घायल होए
दूनो युवक मन ल इलाज बर पखांजुर सिविल अस्पताल म भर्ती करे गे हे.