दंतेवाड़ा. जिला म लोकसभा निर्वाचन के तहत मतदान करे बर मतदाता मन के व्यापक सहभागिता बर मतदाता जागरूकता अभियान चलाए जात हे. जेखर अंतर्गत महिला समूह मन के संगेच स्कूल के छात्र-छात्रा मन कोति ले मतदाता जागरूकता रैली निकाल के मतदाता मन ल मतदान करे के संदेश देहे जात हे. उन्हें स्कूल के छात्र-छात्रा मन चित्रकला अऊ रंगोली के जरिये मतदाता मन ल जागरूक करत हें.
इही कड़ी म पाछू दिन बड़ेकमेली, मेटापाल अऊ कोडेनार आंगनबाड़ी केंद्र मन म मतदाता जागरूकता कार्यक्रम आयोजित करे गीस.। जेमां आंगनबाड़ी कार्यकर्ता, आंगनबाड़ी सहायिका, मितानिन संग महिला स्व-सहायता समूह मन के महिला मन ह सक्रिय सहभागिता निभा के मतदाता मन ल मतदान करे बर प्रेरित करिन. ए दौरान महिला मन ह मतदाता जागरूकता रैली निकालिन अउर ग्रामीण मतदाता मन ल अवइया 11 अपरेल के दिन मतदान केंद्र म जाके खच्चित मतदान करे के आग्रह करिन. महिला मन ह हरेक निर्वाचन म मतदान करे के शपथ लीन अऊ आन मतदाता मन ल मतदान करे बर प्रोत्साहित करे के तको संकल्प लीन.
अइसनहे शासकीय उच्चतर माध्यमिक विद्यालय दंतेवाड़ा अऊ कस्तूरबा गांधी कन्या आवासीय विद्यालय दंतेवाड़ा के छात्र- छात्रा मन संग अध्यापक-अध्यापिका मन ह घलव मतदाता जागरूकता रैली निकाल करके जागरूक मतदाता के पहचान- आओ करव मतदान, सब्बो काम छोड़ दव-सबले पहिली व्होट दव’ आदि नारा-स्लोगन के माध्यम ले मतदाता मन ल मतदान करे बर प्रेरित करिन.
एखर संगेच छात्र-छात्रा मन ह चित्रकला अउर रंगोली बनाके मतदाता मन ल मतदान करे के संदेश दीन. उन्हें ए छात्र-छात्रा मन ह अपन घर-परिवार के वयस्क सदस्य मन संग तीर-तार के मतदाता मन ल मतदान करे बर जानकारी देके लोकतंत्र के पर्व म सहभागिता निभाये के आह्वान करे के संकल्प व्यक्त करिन.
Other Articles
