बरकरार रहही जनता कांग्रेस अउ बसपा के गठबंधन

रायपुर. छत्तीसगढ़ म बहुजन समाज पार्टी अउ जनता कांग्रेस छत्तीसगढ़ (जे) के बीच गठबंधन बरकरार रह ही. लिहाजा लोकसभा चुनाव बर अब छत्तीसगढ़ के बाकी 5 प्रत्यासी मन के घोसना घलो जल्द हो सकत हे. बता देवन के, एखर बर शनिवार दुपहर के जोगी बंगला म बइठक होइस हे. विधायक देवव्रत सिंह ह ये बारे म जानकारी दीन.

उमन कहिन के, जेसीसीजे पूरा 11 सीट मन म चुनाव लड़े बर तइयार हे, लेकिन अभु बसपा ले बातचीत के बाद ही बाकी 5 सीट मन म निरनय हो ही. बता देवन के, 6 सीट मन म बसपा अपन प्रत्याशी उतार चुके हे. जनता कांग्रेस छत्तीसगढ़ (जे) के पार्लियामेंट्री बोर्ड के बइठक खत्म होय के बाद देवव्रत सिंह ह पत्रकार मन ले चर्चा करत हुए कहिन के, बइठक म आगामी लोकसभा चुनाव के बिषय मन म चर्चा करे गिस.

एमा कोर कमेटी ह निरनय लिस हे के, बसपा सुप्रीमो अउ जनता कांग्रेस सुप्रीमो मिल के छत्तीसगढ़ के पांच सीट मन म प्रत्यासी चयन करही. आज के बइठक म जनता कांग्रेस सुप्रीमो अजीत जोगी, अमित जोगी, रेणु जोगी, धर्मजीत सिंह समेत अन्य संसदीय बोर्ड कमेटी लोग सामिल रहिन.