बिहाव के रस्म अऊ रिवाज ले निकाल लिस हे ऐ मन ह फुरसत.. देखव लोकतंत्र के बड़का तिहार के तरह-तरह के रंग

रायपुर. छत्तीसगढ़ म तीसर चरण के मतदान के बेरा म कुछ एईसे फोटू अऊ विडियो देखे बर मिलत हे जेन ल देखके अपन लोकतंत्र अऊ ओखर पहरेदार मन उपर फक्र जरूर होथे। एक कोती जीवन म एक बार होवईया बिहाव अऊ ओखर खुशी संग रस्म अऊ रिवाज… त दूरस कोती लोकतंत्र के पहरेदारी के जूनून… जब दूनों आपस म मिल जाथे त सामने आथे कुछ अईसनेच तस्वीर .. विडियो में आपो मन देखो……..

बता देन कि डोंडीलोहारा विधानसभा क्षेत्र के ग्राम भेड़ी मतदान केंद्र क्रमांक 81 म हल्दी लगाके दुल्हन ह मतदान करे बर पहुंते रिहिस। दुल्हिन के नाव रीना साहू हे जेन ह कहिथे कि मतदान ह देश के भविष्य बर बहुत जरूरी हे।

उहें महासमुंद ले दुल्हन रूचि वर्मा के घलो सुग्घर विडियो आए हे जेमा ओमन ह अपन मत के उपयोगिता ल बतावत हे। रुचि ह कहिथे कि कतनों जरूरी काम रहे लोगन मन ल अपन मत के प्रयोग करना चाही। दुल्हिन रुचि ह अपन बिहाव के रस्म ल छोड़ के मतदान करे बर पहुंचे रिहिन।

ऐ कोती राजनांदगांव म घलो फक्र ले सीना चौड़ा हो जाए अईसे तस्वीर आगू आ हे। संबलपुर बूथ क्रमांक 63 म दुल्हिन अऊ दुल्हा ह दूनों झन मतदान केन्द्र पहुंचे रिहिन। ऐ बेरा म दूनों के शरीर म तेल हल्दी घलो चुपराए रिहिस।