प्रदेश प्रभारी पुनिया ह मंत्री मन ल दिस नसीहत, काम म देवव ध्यान नई ते जा सकत हे कुर्सी
रायपुर। छत्तीसगढ़ प्रदेस प्रभारी पीएल पुनिया ह राज्य के मंत्री मन ल नसीहत के संग म ओ मन ल चेतावनी घलो दे हे। प्रदेस प्रभारी पुनिया ह कहिन हे कि कोनो ये मत सोचव कि ओला पांच साल बर कुर्सी दे देहे। मंत्री मन अपन काम म ध्यान देवव कहूं प्रदर्शन सही नई होही त ओला कार्यकाल ले पहिली ही मंत्री पद ले हटाय जा सकथे।
बता देन कि प्रदेस प्रभारी पुनिया ह शनिवार के कांग्रेस के नवा प्रदेस अध्यक्ष मोहन मरकाम के पदभार कार्यक्रम म शामिल होय बर आए रहिस। इही मौका म श्री पुनिया ह कार्यकरता मन ल संबोधित करत कहिन कि प्रदेस म मंत्री मंडल म एक पद खाली रिहिन, जेखर जिम्मेदारी सीतापुर विधायक अमरजीत भगत ल देदे गे हे। इही दउरान ओ ह ये भी कहिन कि प्रदेस ल नवा प्रदेस अध्यक्ष मिल गे हे। अब पीसीसी के कार्यकारणी भंग होय के संग म नवा प्रदेस अध्यक्ष ल ये भी जिम्मेदारी मिल गे हे कि नवा सिरा ले कार्यकारिणी बनाही।
