राजधानी के ट्रक ड्राइवर ल बंधक बनाके ओडिशा म लूटिस, रायपुर म लवारिस हालत म मिलिस ट्रक ह

रायपुर. राजधानी रायपुर के एक ट्रक ड्राइवर अउ ओखर हेल्पर ल ओडिशा के नवरंगपुर म बंधक बना के ट्रक ल लूट के ले जाए के मामला सामने आए हे. आरोपी मन ह ट्रक मालिक ले फिरौती मांगे के बाद ट्रक ल लावारिस हालत म रायपुर के आमानाका थाना क्षेत्र म छोड़े रिहिस, जेन ल सोमवार के आमानाका पुलिस ह बरामद करिस हे.

आज दोपहर म ट्रक क्रमांक यूपी 12 एल 9894 नंदनवन रोड म एक झाड़ के पास लावारिस हालत म मिलिस. जेखर सूचना मिले ले पुलिस ह मौका म पहुंच के ट्रक के चालक अउ मालिक के बारे म पता लगईस. इही दउरान पुलिस ल ये जानकारी मिलिस कि 19 जून के अज्ञात स्कार्पियों सवार कुछ बदमाश मन ओडिशा के नवरंगपुर म ट्रक चालक अउ हेल्पर ल बंधक बनाके मोबाइल, 51 हजार रूपिया ल लूट लिस. एखर बाद बदमाश मन के दू साथी मन ह ट्रक ल लेके रायपुर तरफ भागे रिहिस. नवरंगपुर पुलिस ह ये मामला म 6 झन आरोपी ल पकड़े हे अउ दू झन ह अभी फरार हाबय. पुलिस ह आशंका जतात हे कि दूनो झन फरार आरोपी ह रायपुर के रहवईया होही.