कसही म लोगन ल उल्टी-दस्त के शिकायत

धमतरी। कसही गांव म लगातार डायरिया के रोगी मिलत हे। गांव के 17 लोगन ल डायरिया के मरीज के रूप म चिह्नांकित करे गिस हे। जबकि चार झन गंभीर मरीज ल उपचार बर अस्पताल म भरती कराय गिस हे। मरीज मन म लइका लेके सियान   सामिल हे।

धमतरी जिला मुख्यालय ले करीबन 20 किलोमीटर दूर हंकारा पंचायत के आश्रित ग्राम कसही म ये दिन म लोगन ल उल्टी-दस्त के शिकायत होवत हे। डायरिया के बढ़त मरीज मन के संख्या ल देखत हुए गांव के मुखिया सरपंच मुकेश धुव ह स्वास्थ्य अमला ल येकर जानकारी दीस। बोडरा उपस्वास्थ्य केन्द्र के सुपरवाइजर अउ स्वास्थ्य कारयकरता मन के टीम ह गांव म डायरिया पीड़ित मन के पहिचान करे हे।

बताय गे हे कि गांव के छन्नूलाल धुवंशी, चम्मन कुमार, सुशीला पाल, श्याम धुव, वैशाली, तुलसी धुव, भूषण कश्यप, मंजूलता कश्यप, सुभाष कश्यप, बालमकुंद , डोमन, राधेश्याम कश्यप, रामफूल कश्यप समेत 17 लोगन मन डायरिया के चपेट म हे। येमा चार लोगन ल बेहतर इलाज बर केन्द्री के स्वास्थ्य केन्द्र म भरती कराय गे हे। फिलहाल स्वास्थ्य बेभाग के करमचारी ओआरएस के पैकेट घरों-घर  म वितरन करके सेवन करे के सलाह देवत हे। उहें पीय के पानी म क्लोरिन डाले के नसीहत देवत हे।