स्टेशन म फोटो खींचे के नाम म युवक के कर दिस पिटाई, मामला दर्ज

रायपुर. राजधानी म एक ठन अइसे मामला सामने आए हे, जिहां फोटो खींचे के नाम म दू झन युवक मन ह पीड़ित के संग मारपीट अउ ओखर मोबाइल, मोटर साइकिल म तोड़फोड़ करिस हे। घटना मंदिरहसौद थाना इलाका के हरे। मामला ये हरे कि मंदिरहसौद रेलवे स्टेशन के प्लेटफार्म म फोटो खींचे ल लेके रायपुर के रहवईया अभिषेक सेन के संग भोला अउ अनिल यादव के बीच विवाद हो गे। ये विवाद ह अतेक बढ़ गे कि भोला यादव अउ अनिल यादव ह मिलके अभिषेक सेन ल पीट दिस, संगे-संग ओखर मोबाइल अउ मोटर साइकिल म घलो तोडफ़ोड़ करीस। जेखर शिकायत अभिषेक सेन ह थाना म करीस त उंखर शिकायत म पुलिस ह आरोपी के खिलाफ धारा 294, 506, 323, 427, 34 के तहत मामला दर्ज करिन हे।