रायपुर। बीते सात दिन म पूरा राज्य म मात्र सवा इंच बरसा होय हे। हप्ताभर पहिली तक छत्तीसगढ़ म बरसा औसत ले 11 प्रतिशत कम रिहिस। 13 ले 19 जुलाई तक 30 मिमी बरसा होईस। मानसून के जुड़ाय ले राज्य के 17 जिला मन सामान्य ले कम बरसा वाला क्षेत्र म आ गे हें। अभी भी पूरा राज्य म मानसून के मजबूती ले सक्रिय होय के संभावना नई हे।
मौसम विज्ञानी मन के कहना हें कि कुछ-कुछ हिस्सा म हल्का ले मध्यम बरसा ही होही। झमाझाम बारिश के अभी कोनो उम्मीद नई दिखत हे। राज्य म बरसा के जउन कमी आय हे ओला पूरा होय म समय लग सकत हे।
जुलाई के पहिली पखवाड़ा म थोरिक अच्छा बरसा होईस, लेकिन एकर बाद बरसने वाला बादर छत्तीसगढ़ ले दूरिहा चले गे। समुद्र म कोनो बड़े हलचलेच नई होईस, अउ न तो छत्तीसगढ़ के आसपास कोनो सिस्टम ही बनिस। ए कारण ले राज्य के कोनो डाहर भी भारी बरसा होबे नई करिस। कई दिन तक राज्य के जादातर जिला मन म 10 मिमी तक घलो बरसा नई होईस।
विशेषज्ञ मन के कहना हे कि सरगुजा, राजनांदगांव, रायपुर, रायगढ़, मुंगेली, कोरिया, कबीरधाम, दुर्ग, बेमेतरा, बलरामपुर, बलौदाबाजार अउ बालोद म बरसा बहुते कम होय हे। इस कारण राज्यभर म बरसा के औसत कम हे।
बाकी जिला मन म बरसा के कमी हा बहुत ज्यादा चिंताजनक नई हे। ये जिला मन म 35 ले 57 फीसदी तक बरसा होए हे। माने ये समय तक जतका बरसा होना चाही रिहिस ओकर आधा या ओकर ले थोरिक जादा बरसा हो पाए हे। खेती-किसानी बर ये नाकाफी हे।
जानकार मन के कहना हे कि बरसा के कमी तो अगस्त म भी पूरा हो सकत हे। एक-दू तगड़ा सिस्टम बन जाय अउ हफ्ता-दस दिन जमके बरसा हो जाय त ये कमी पूरा हो जाही, लेकिन तब तक राज्य म खरीफ के खेती पिछवा जाही।
पूरा राज्य म सिर्फ एक ही जिला कोंडागांव हे, जिहां सामान्य ले जादा बरसा होय हे। इहां अब तक 610.3 मिमी बरसा हो चुके हे। राज्य के 9 जिला बस्तर, बीजापुर, धमतरी, गरियाबंद, महासमुंद, नारायणपुर, सुकमा अउ सूरजपुर म अब तक नार्मल बरसा होय हे। मौसम विभाग के अनुसार सामान्य ले 19 फीसदी तक कम या जादा बरसा ला नार्मल माने जाथे।
सामान्य से कम बरसा वाला जिला म बालोद, बलौदाबाजार, मुंगेली, बलरामपुर, बेमेतरा, बिलासपुर, दुर्ग, जांजगीर, जशपुर, कबीरधाम, कांकेर, कोरबा, कोरिया, रायगढ़, रायपुर, सुकमा अउ सरगुजा हे। इहां 19 से 57 फीसदी तक कम पानी गिरे हे।
