बुढ़वा बबा के कमाल, पानी बर तरसत गांव म अकेल्ला खन डारिस तरिया, चार साल तक बोहाईस पसीना
हमीरपुर. पहाड़ ला फोर के रस्ता बनईया दशरथ मांझी ला आज लइका लइका जानथें। ओकरे कस आम लोगन के सुविधा बर एक अउ आदमी काम करे हे, जेकर गोठ आज सबो कोती होवत हे।
वो आदमी के नाम हे कृष्णानंद बाबा, जउन हा बुढ़ापा म भी चार साल तक लगातार मेहनत करके अकेल्ला तरिया खन डरिस।
बात ये आय कि हाईलेवल मीटिंग म बड़े-बड़े प्रोजेक्ट बनाए के बाद भी बुंदेलखंड ला सूखा के समस्या ले शासन प्रशासन हा उबार नई पाए हे। लेकिन, एक बुजुर्ग हा अपन पुरुषार्थ ले अपन गांव के पानी के समस्या के समाधान कर दीन हें।
हमीरपुर के सुमेरपुर थाना क्षेत्र के गांव बड़े पचखुरा म ए साल भारी गर्मी म घलो पानी के समस्या ले गांव वाला मन ला जूझे बर नई परिस। काबर कि इहां रहने वाला कृष्णानंद बाबा हा 4 साल तक अकेल्ला जूझत गांव के प्राचीन 8 बीघा के तालाब ला 12 फीट गहरा खोदके नवा जीवन दे दिस।
अब ये तालाब हा पानी ले लबालब हे। बबा ला अब लोगन मन बुंदेलखंड के दशरथ मांझी कहिथें अउ ओकर जय-जयकार करत हें।
