शीला दीक्षित पंचतत्व म विलीन, मुख्यमंत्री भूपेश बघेल हा दिल्ली पहुंच के दीन श्रद्धांजलि
रायपुर/नई दिल्ली। दिल्ली के पूर्व मुख्यमंत्री शीला दीक्षित (81) हा पंचतत्व म विलीन हो गें। निगमबोध घाट म राजकीय सम्मान के साथ रविवार दोपहर अंतिम संस्कार करे गिस।
छत्तीसगढ़ के मुख्यमंत्री श्री भूपेश बघेल हा नई दिल्ली पहुँच के स्वर्गीय श्रीमती शीला दीक्षित के पार्थिव शरीर म पुष्प अर्पित कर के दिवंगत आत्मा ला श्रद्धांजलि दीन।
एकर पहिली श्रीमती शीला दीक्षित के पार्थिव देह ला कांग्रेस मुख्यालय म अंतिम दर्शन बर रखे गे रिहिस। उहां श्रीमती सोनिया गांधी अउ प्रियंका गांधी समेत कांग्रेस नेता मन श्रद्धांजलि दीन।
सोनिया गांधी हा किहिन कि ओ मोर बड़े बहिनी अउ दोस्त रिहिन। हमेशा मोला उंकर समर्थन मिलिस। शनिवार दोपहर राजधानी के फोर्टिस एस्कॉर्ट्स हॉस्पिटल म कॉर्डियक अरेस्ट ले दीक्षित के निधन हो गे।
ओमन 15 साल दिल्ली के मुख्यमंत्री रिहिन। लोकसभा चुनाव ले पहिली कांग्रेस हा 10 जनवरी के ओमन ला दिल्ली के कमान सौंपे रिहिस।
एकर पहिली प्रधानमंत्री श्री नरेंद्र मोदी अउ मुख्यमंत्री श्री अरविंद केजरीवाल हा शनिवार संझा पूर्वी निजामुद्दीन म दीक्षित के आवास म पहुंच के श्रद्धांजलि दीन।
उंकर अलावा पूर्व प्रधानमंत्री श्री मनमोहन सिंह, पूर्व राष्ट्रपति श्री प्रणब मुखर्जी, पूर्व विदेश मंत्री श्रीमती सुषमा स्वराज समेत कई नेता उंकर अंतिम दर्शन बर पहुंचिन। केजरीवाल सरकार हा दिल्ली म दू दिन के राजकीय शोक के घोषणा करे हें।
