भूत ले खौफजदा हे ए परिवार, जिहां जाथे पथरा फेंकत हे कोनों अदृष्य शक्ति, आधा दर्जन ठिकाना बदल डरे हे फेर नई मिलिस निजात

जशपुर। जिला म एक ठन अजीबो-गरीब मामला आघू आए हे। एक परिवार ह अज्ञात शक्ति के हमला ले पाछू के एक साले ले परेशान हे। परिवार के लोगन मन के कहिना हे कि भूत ह उंखर परिवार के सदस्य मन ऊपर पत्थर फेंकथे। ये मामला के पुलिस म शिकायत कर मदद के गुहार लगाए हे।

दरअसल ये हइरान करईया मामला जशपुर के बगीचा थाना के आय, जिहां पंडरापाठ चौकी के अंतर्गत सुलेसा के भितवाही गांव म रामकृपाल यादव ह अपन माता-पिता अउ दू बहिनी संग रहिथे। फेर अब ये परिवार ह अज्ञात अउ अदृश्य तत्वों के पत्थरबाजी ले परेशान होके दर-दर भटके ल मजबूर हो गे हे। इही कारन ले ये परिवार ह बीते एक साल म 6 ले जादा ठिकाना घलो बदल डारे हे फेर समस्या जस के तस बने हाबय।

ये परिवार ह अपन ठिकाना बदल के जिहां भी रिहथे, उंहो पत्थरबाजी के घटना शुरू हो जथे। पत्थरबाजी म परिवार के कई झन घायल घलो हो गे हे। खास बात ये हे कि पत्थर मरईया ह न तो दिखाई देथे अउ न ही पकड़ म आवत हे। ये हमला कभू भी कहूं भी हो जथे। ये परिवार ह आखिरकार थक-हार के पुलिस ले मदद के गुहार लगईन हे। पीड़ित परिवार ह भूत के शिकायत लेके थाना  पहुंच गे अउ अपन सुरक्षा के संग भूत ऊपर कार्रवाई करे के मांग करत हे। उंहे ये मामला म पुलिस ह जांच करे के बात करत हे।