महासमुंद. अपन संगवारी मन ला बचाए खातिर एक छात्र हा नदी म कूद गे, ओखर संगवारी मन त बांच गे फेर ओहा खुदे नदी के प्रवाह म लीन हो गे। अब्बड़ खोजबीन के बाद दूसर दिन संझा ओखर लाश ल बरामद करे गिस।
ए घटना छत्तीसगढ़ के महासमुंद जिला के सरायपाली थाना क्षेत्र के छिबर्रा गांव के आय। इहां के कुछ नाबालिग छात्र मन नहाए बर सुरंगी नदी म गे रिहिन। इही दौरान ये हादसा हो गे।
जानकारी के मुताबिक, छिबर्रा डायवर्सन एनीकट म नहाए बर गांव के 6 लड़का शुक्रवार संझा निकले रिहिन। एनीकट म नहावत रिहिन, तभे एक लड़का के पांव फिसल गे अउ ओ हो गिरे लगिस। ओहा बचे बर दूसर लड़का के हाथ ला धर लिस, अउ देखते-देखत दूनों झन एनीकट म गिर गें।
दूनों झन ला पानी म बूड़त देखके कक्षा 11वीं म पढ़इया अमन प्रधान हा ओमन ला बचाए बर नदी म कूद दिस। ओमन ला बचाए के प्रयास म अमन हा खुद भंवर म फंस गे। ओकर दूनों दोस्त मन तो पानी म बोहावत किनारा म आ गिन, लेकिन अमन हा नदी म बोहागे।
बताए जाथे कि एनीकट म करीब 4-5 फीट पानी के धार चलत रिहिस। गांव वाला अउ गोताखोर मन संग बसना, सरायपाली अउ बलोदा के पुलिस छात्र के खोजबीन करत रिहिस। रातभर अउ दूसर दिन दिनभर खोजबीन के बाद शनिवार के संझा एनीकट ले एक किमी दूरिहा म तोरेसिन्हा मार्ग के पुलिया करा ओखर लाश मिलिस।
