मछली पकड़े बर गे रिहिस मछुआरा मन अचानक बाढ़ आए ले फंस गे नदिया म, एसडीआरएफ के टीम ह बचाईस जान
पखांजूर। कांकेर जिला के मेंढकी नदिया म फंसे रिहिस 6 मछुआरा ल एसडीआरएफ के टीम ह सफलतापूर्वक बाहिर निकालिस हे। 7 झन मछुआरा मन सोमवार के दिन मछली पकड़े बर मेंढकी नदिया गे रिहिस। मछली पकडे बर गे रिहन। रात में अचानक नदिया म बाढ़ आ गे अउ वो मन ह उंहे फंस गे ताहन सब्बो झन एक ठन पेड़ म चढ़ के रात बिताए रिहिन।
जानकारी के मुताबिक दूसर दिन मंगलवार के मंझनिया एक झन मछुआरा सुधांशु हालदार ह अपन जान के परवाह नई करत उफनत नदिया ल जईसे-तईसे पार करिस अउ परतापुर थाना में जाके जानकारी दिस।
मामला के गंभीरता ल देखत परतापुर थाना प्रभारी ह उच्चाधिकारी मन ल तुरंत जानकारी दिस ताहन पखांजूर तहसीलदार अउ पटवारी ह रातकन जिला रेस्क्यू टीम के संग मौका म पहुंच गे रिहिस। फेर नदिया म जादा पानी होय ले बचाव कार्य शुरू नई कर सकिस। बिहनिया ले वो मन ह पानी कमतियाय के इंतजार करत रिहिस। मंझनिया पानी ह थोकन कम होईस ताहन जिला रेस्क्यू टीम ह बचाव कार्य शुरू करिस हे। फेर वो मन ल सफलता नई मिलिस।
जिला रेस्क्यू टीम के दू झन जवान मन डोरी ल नदिया के दूसर पार ले जाए के कोशिश करत रिहिस, इही दउरान एक जवान ह पानी म बोहागे अउ एक किलोमीटर दूर जाके पेड़ ल पकड़ के अपन जान ल बचाईस हे। थोरकिन समय के बाद जगदलपुर ले एसडीआरएफ के रेस्क्यू ऑपरेशन टीम ह स्पीड बोट लेके पहुंचिस अउ चंद मिनट म नदिया में फंसे सबो 6 मछुआरा ल बाहिर निकालिन हे। रेस्क्यू ऑपरेशन के दउरान प्रसासन के बड़े अधिकारी एसडीएम निशा नेताम मंडावी, एडिशनल एसपी राजेंद्र कुमार जायसवाल, एसडीओपी मयंक तिवारी, पखांजूर थाना प्रभारी शरद दुबे ह दल-बल के संग हालात के जायजा लेवत रिहिस। उंहे घोर नक्सली इलाका होय के कारन मेंढकी नदिया तक बीएसएफ के जवान मन ह बिहनिया ले रात 9 बजे तक सुरक्षा म तैनात रिहिन हे।
