युवती ह युवक ल सिगरेट के धुंआ उड़ाए बर करिस मना, हो गे विवाद, युवक ह संगी-साथी के संग आके चाकू अउ तलवार ले करिस हमला, दू के हालत गंभीर

अंबिकापुर। महुआ टिकरा गांव म युवक ल सिगरेट के धुंआ उड़ाए ल मना करईया युवती ल भारी पड गे। युवक ह अपन संगी साथी के संग आके युवती अउ ओकर परिवार के सदस्य मन ऊपर तलवार अउ चाकू ले हमला कर दिस, जेमा दू झन के हालत ह गंभीर हे। ये घटना ले गांव म दहशत के माहौल हे। घटना के सबो हमलावर मन फरार हो गे।

अईसे जानकारी मिले हंवय कि महुआ टिकरा गांव म एक झन युवती ह अपन दुकान म बईठे रिहिस। राहुल नाम के युवक ह अईस अउ उहें सिगरेट खरीदिस। वो ह दुकान म ही सिगरेट ल पीये ल लग गे अउ ओकर धुंआ ल युवती ऊपर उड़ावत रिहिस। युवती ह मना करिसि तभो ले राहुल ह नई मानिस।

इही बात ल लेके युवती ह ओला थपरा म मार दिस अउ युवती के घर वाले मन घलो आ गे ताहन विवाद होय ल लग गे। युवक ह उहां ले भाग गे फेर थोरकिन समय बाद वो ह चाकू अउ तलवार के साथ अपन 10-12 संगी-साथी मन ल ले के दुकान पहुंच गे अउ युवती समेत ओकर परिवार वाले मन ऊपर हमला कर दिस, जेमा युवती समेत परिवार के आधा दर्जन के जादा झन घायल हो गे।

घायल मन के इलाज अंबिकापुर के मेडिकल कॉलेज म चलत हे, जेमा दू झन के हालत ल गंभीर बतात हे। घटना के बाद ले गांव वाले मन दहशत म हे। घटना के शिकायत के बाद पुलिस ह फरार हमलावर मन के खोजबीन करे म जुटिन हे।