रायपुर समेत राज्य के कई जिला म झमाझम बरसा, नदिया-नरवा हे उफान म, बस्तर संभाग बर रेड अलर्ट जारी
रायपुर। राजधानी रायपुर समेत राज्य के कई जिला म भारी बरसा होय ले नदिया अउ नरवा म उफान हे। बस्तर संभाग म बाढ़ आए ले सैकड़ों गांव के संपर्क जिला मुख्यालय ले टूट गे हे। अवईया 24 ले 48 घंटा के भीतर भारी पानी गिरे के चेतावनी मौसम विभाग ह दे हे। संगे-संग यलो अउ ऑरेंज अलर्ट घलो जारी करिन हे। उंहे बस्तर संभाग के कुछ हिस्सा म भारी ले अतिभारी बारिस के संभावना जतात रेड अलर्ट जारी करे हे।
मौसम विभाग के मुताबिक अतेक मजबूत सिस्टम बने हंवय कि अगर अनुमान के मुताबिक पानी गिरही त खेती-किसानी बर पानी के समस्या ह खतम हो जाही। खासकर मध्य छत्तीसगढ़ के 9 जिला जिहां औसत ले कम बरसा होय हे, जेमा बिलासपुर, रायपुर, राजनांदगांव, जसपुर, सरगुजा, दुर्ग अउ जांजगीर-चांपा सामिल हे।
उंहे बस्तर म लगातार पानी गिरे ले नदिया अउ नरवा उफान म हे, कई जगह म आवागमन ह ठप हो गिन हे। एक बार फेर जिला म भारी बरसा ले बाढ़ के स्थिति बन गिन हे।
