वायु सेना भरती रैली 13 अक्टूबर ले, प्रदेश के जम्मो जिला के अभ्यर्थी होही सामिल

धमतरी। भारतीय वायुसेना द्वारा जिला म पहिली बार वायुसेना भरती रैली के आयोजन करे जात हे। स्थानीय बाबू पंढरीराव कृदत्त इंडोर स्टेडियम म 13 ले 19 अक्टूबर तक बिहनिया पांच बजे ले होवईया ये रैली म प्रदेश के 27 जिला के अभ्यर्थी मन भाग लिही। धमतरी जिला के अभ्यर्थी ह दूसरैया चरण म 16 अक्टूबर के रैली म सामिल होही। एकर बर प्रशासनिक तियारी लगभग पूरी कर ले गे हे।

गौरतलब हंवय कि पहिली चरण म 13 अउ 14 अक्टूबर तक राज्य के 13 जिला के  प्रतिभागी रैली म हिस्सा लिही। एमा बालोद, बस्तर, बीजापुर, दंतेवाड़ा, दुर्ग, गरियाबंद, कांकेर, कोंडागांव, महासमुंद, नारायणपुर, रायगढ़, राजनांदगांव अउ सुकमा जिला के अभ्यर्थी सामिल हे। इही तरह ले दूसरैया चरण म 16 ले 17 अक्टूबर तक आयोजित भरती रैली म धमतरी जिला सहित रायपुर, बलौदाबाजार, बलरामपुर, बेमेतरा, बिलासपुर, जांजगीर-चांपा, जशपुर, कवर्धा, कोरबा, कोरिया, मुंगेली, सरगुजा तथा सूरजपुर जिला के अभ्यर्थी सामिल होही।

अभ्यर्थी मन के पात्रतानुसार शारीरिक, लिखित अउ अन्य परीक्षण करे जाही। वायुसेना के ग्रुप वाई (ए.आई.) बर क्रमशः 13 अउ16 अक्टूबर के बिहनिया पांच से दस बजे के बीच टोकन दे जाही। टोकन प्राप्त उम्मीदवार ही परीक्षा म हिस्सा ले सकही। ग्रुप वाय बर शारीरिक योग्यता परीक्षण (फिजिकल फिटनेस टेस्ट) म 1600 मीटर के दौड़ अधिकतम छह मिनट 30 सेकण्ड म पूरा करना पडही। एमा क्वालिफाई करे बर 10 बार पुशअप अउ 10 बार सिटअप घलो करना पडही।

अभ्यर्थी ल अपन साथ 10 पासपोर्ट आकार के रंगीन नवा फोटू, दू ठन सफेद रंग के बड़े साइज के लिफाफा के अलावा कक्षा दसवीं, 12 वीं अथवा समकक्ष परीक्षा के प्रमाण-पत्र, एनसीसी (यदि हो), प्रमाण-पत्र की मूल प्रति, प्राधिकृत अधिकारी द्वारा जारी मूल निवास प्रमाण-पत्र (सबो दस्तावेज के मूल संग तीन-तीन फोटोकापी), रबर, पेंसिल, पेन साथ म लाना अनिवार्य हे।

भरती रैली बर कोनो आवेदन पत्र के जरूरत नई हे। एमा सिर्फ अविवाहित युवक शामिल हो सकथे, जेकर जन्म 19 जुलाई 1999 ले एक जुलाई 2003 के बीच होय हे। न्यूनतम उंचाई 165 सेंटीमीटर तथा कम से कम 50 प्रतिशत अंक के साथ कक्षा 12 वीं पास हो, जेमा अंग्रेजी विषय न्यूनतम 50 प्रतिशत अंकों के साथ उत्तीर्ण हो।