प्रदेश के विकास बर अवइया पंचवर्षीय कार्य-योजना घलोक तइयार: डॉ. रमन

रायपुर । मुख्यमंत्री डॉ. रमन सिंह ह कहिन के राज्य सरकार ह आम जनता के बेहतरी बर पाछू 14 बछर म विकास के सब्बो मापदंड स्थापित करे हे अऊ छत्तीसगढ़ ल रोड कनेक्टिविटी अउ इंटरनेट कनेक्टिविटी ले घलोक सफलतापूर्वक जोड़े हे। उमन कहिन कि छत्तीसगढ़ सरकार ह प्रदेश के तेज विकास बर अवइया पांच साल के कार्य-योजना घलोक तैयार कर लेहे हे। डॉ. सिंह ह दावा करिन के ए दौरान छत्तीसगढ़ देश के पहिली तीन सबले जादा विकसित राज्य मन के श्रेणी म सामिल हो जाही। उमन कहिन – सरकार जनता के सहयोग ले ए दिशा म सरलग काम करत हे।
मुख्यमंत्री सोमवार के विकास यात्रा के बेरा म रायगढ़ जिला के विकासखंड अऊ तहसील मुख्यालय लैलूंगा म एक विशाल जनसभा ल संबोधित करत रहिन। उमन लैलूंगा के बाद जशपुर जिला के विकासखंड मुख्यालय दुलदुला म घलोक उमड़त जनसैलाब के बीच विशाल आम सभा ल सम्बोधित करिन। दुनों आमसभा मन म जनता ह मुख्यमंत्री के जोशीला स्वागत अऊ अभिनंदन करिन। रंग-बिरंगा परम्परागत परिधान म सजे-धजे लोक नर्तक मन ह घलोक मुख्यमंत्री अऊ विकास यात्रा के स्वागत म आकर्षक नृत्य के प्रदर्शन करिन। दुनों आमसभा मन म मुख्यमंत्री ह 147 करोड़ 61 लाख रूपिया के 364 निर्माण कार्य मन के लोकार्पण, भूमिपूजन अऊ शिलान्यास करिन। उमन लैलूंगा के आम सभा म जनता ल 41 करोड़ 61 लाख रूपिया के 64 कई ठन निर्माण कार्य मन के सौगात दीन। एमां 12 करोड़ 32 लाख रूपिया के तीन पूरा हो गए कार्य मन के लोकार्पण अऊ 29 करोड़ 35 लाख रूपिया के 61 नये निर्माण कार्य मन के शिलान्यास अऊ भूमिपूजन ऊंखर हाथ पूरा होइस। मुख्यमंत्री ह दुलदुला के आमसभा म 103 करोड़ रूपिया के 300 निर्माण कार्य मन के लोकार्पण, भूमिपूजन अऊ शिलान्यास करिन। एमां ले 50 करोड़ 10 लाख रूपिया के काम पूरा हो गे हे। 81 निर्माण काम मुख्यमंत्री के हाथ लोकार्पित होइस। उमन दुलदुला क्षेत्र बर 53 करोड़ 49 लाख रूपिया के 219 निर्माण कार्य मन के भूमिपूजन अऊ शिलान्यास घलो करिन।