रायपुर । छत्तीसगढ़ ल देश म अनाज पैदावार म सबले अव्वल राज्य के राष्ट्रीय पुरस्कार मिले हे। छत्तीसगढ़ ल ये पुरस्कार पाछू के सबले जादा पैदावार के मुकाबला 28.68 प्रतिशत बढ़ोत्तरी बर दे गए हे। छत्तीसगढ़ के कृषि मंत्री बृजमोहन अग्रवाल ह रविवार के नई दिल्ली म एक गरिमामय समारोह म केंद्रीय कृषि मंत्री राधा मोहन सिंह ले ये पुरस्कार झोंकिंन। ए बेरा म आन राज्य मन के कृषि मंत्री घलोक उपस्थित रहिन। पुरस्कार समारोह म कृषि मंत्री अग्रवाल ह कहिन कि धान के बेहतर अऊ उच्च गुणवत्ता के किस्म मन के खेती म जोर देहे, मक्का के बेहतर उपज अऊ राज्य म सिंचाई संसाधन मन के जल्दी विकास ले छत्तीसगढ़ ल ये वाले सफलता मिले हे। ए बेरा म छत्तीसगढ़ के कृषि विभाग के सचिव अनूप श्रीवास्तव अऊ संचालक कृषि एम.एस. केरकेट्टा घलोक उपस्थित रहिन।
