रसोई गैस के दाम बढ़ाए के विरोध म महिला कांग्रेस करिस प्रदर्शन, चूल्हा म खाना पकाके जताइस विरोध

जय जोहार रायपुर…. रसोई गैस सिलेंडर के दाम म होइस बढ़ोत्तरी के विरोध म राजधानी रायपुर के गांधी भवन म प्रदेश महिला कांग्रेस ह धरना प्रदर्शन करिस। महिला कांग्रेस के अध्यक्ष फूलो देवी नेताम ह पदाधिकारी मन के संग चूल्हा म खाना पकाके गैस सिलेंडर के दाम बढ़ाए जाना के विरोध करिस।

ये मऊका म महिला कांग्रेस अध्यक्ष फूलो देवी नेताम ह कहिन कि ये मोदी सरकार ह देश के आम आदमी अऊ महिला मन के जेब म डाका डाल दिस हे। मोदी कहत रहिस कि महिला मन के आंख मन म आंसू नई आए देही। इसलिए उज्जवला योजना लावत हे। लेकिन गैस के कीमत मन म वृद्धि ले महिला मन ह रोवत हे। अब वो मन ल फेर चूल्हा के ओर लहुटना परही।

महिला कांग्रेस अध्यक्ष ह कहिन कि वर्ष 2014 म 444 रूपिया गैस के कीमत रहिस, ओखर बाद ले लगातार हरेक महीना गैस के रेट बढ़ावत जात हे। ये महीना सीधा 150 रूपिया दाम बढ़ा दिस हे, आज गैस 970 रूपिया हे।