भाजपा विधायक ह उठाइस चना वितरण म देरी के मामला, मंत्री के जवाब ले असंतुष्ट विपक्ष के सदन म हंगामा

जय जोहार रायपुर…. सदन म शुक्रवार के भाजपा विधायक डॉ. कृष्णमूर्ति बांधी ह चना वितरण म देरी के मामला ल उठाइस। भाजपा विधायक ह कहिन कि योजना के तहत तीन महीना ले चना के वितरण क्यों नई हो पात हे। जवाब म खाद्य मंत्री अमरजीत भगत ह कहिन कि अप्रैल ले जून तक नीतिगत निर्णय लेने अऊ योजना के समीक्षा किए जाए के वजह ले चना के वितरण नई हो पाइस।

ए सवाल म नेता प्रतिपक्ष धरमलाल कौशिक ह कहिन कि सरकार चना नई खरीद पाइस, इसलिए चना के वितरण नई हो पाइस। जवाब म मंत्री ह कहिन कि योजना के तहत जेन चना ल 4800 रूपिया म खरीदा जात रहिस, ओला 3500 रूपिया म खरीदा हे, ये तरह ले समीक्षा के बाद सरकार के 48 करोड़ रूपिया बचाए गे हे। ए वजह ले एमा विलंब होइस।

ए बीच विपक्षी सदस्य मन ह चना वितरण नई होए ल लेके हंगामा करिस। चना वितरण नई होए म दोषी अफसर मन म कार्रवाई के मांग भाजपा विधायक म ह करिस। सरकार के जवाब ले असंतुष्ट होके विपक्ष के सदस्य नारेबाजी कर सदन ले बहिर्गमन कर दिस।