छत्तीसगढ़ युवा वैज्ञानिक कांग्रेस म शामिल होही देशभर ले युवा वैज्ञानिक, सीएम भूपेश बघेल करही शुभारंभ

जय जोहार रायपुर…. राजधानी रायपुर के पंडित दीनदयाल उपाध्याय ऑडिटोरियम म 25 अऊ 26 मार्च के 18वीं छत्तीसगढ़ युवा वैज्ञानिक कांग्रेस के आयोजन करे जाही। एखर शुभारंभ 25 मार्च के बिहिनिया 10.30 बजे मुख्यमंत्री भूपेश बघेल करही। विशिष्ट अतिथि के रूप म उच्च शिक्षा मंत्री उमेश पटेल शामिल होही। सामापन समारोह राज्यपाल अनुसूईया उइके के मुख्य आतिथ्य म 26 मार्च के शाम 4 बजे होही। ए आयोजन ल छत्तीसगढ़ विज्ञान अऊ प्रौद्योगिकी परिषद अऊ पंडित रविशंकर शुक्ल विश्वविद्यालय रायपुर के तत्वावधान म करे जाही।

ए आयोजन म 19 विषय मन म शोध पत्र प्रस्तुत करे जाही। देशभर ले अलग-अलग क्षेत्र ले युवा मन ल एखर बर आमंत्रित करे गे हे। युवा वैज्ञानिक कांग्रेस म 32 ले 35 आयु समूह के पोस्ट ग्रेजुएट डिग्री के संगेसंग कम ले कम दो वर्ष के शोध कार्य ले जुड़े युवा मन ल आमंत्रित करे गे हे। संगेसंग मेडिसिन अऊ इंजीनियरिंग क्षेत्र के स्नातक युवा घलो शामिल हो सकही।