अवइया चौबीस घंटा म प्रदेश म कई स्थान मन म बारिश के संभावना, ओला गिरे के संग चल सकत हे तेज हवा

जय जोहार रायपुर…. प्रदेश म पिछिले कुछु दिनो ले बेमौसम बरसात होवत हे। मौसम विभाग ह अवइया 24 घंटा म प्रदेश म कई स्थान मन बारिश अऊ ओला गिरे के संग तेज हवा चले के संभावना जताए हे।  मौसम वैज्ञानिकों के अनुसार छत्तीसगढ़ के एक या दो स्थान मन म गरज चमक के संग 30 ले 40 किलोमीटर के रफ्तार ले हवा चल सकत हे।

मौसम वैज्ञानिक के मुताबिक ऊपर के लेवल म पश्चिमी हवा आवत हे, जेखर संगम के वजह ले छत्तीसगढ़ म लगातार बारिश के स्थिति बनत हे। काली उत्तर छत्तीसगढ़ म हल्की ले मध्यम वर्षा के संभावना जताए गे रहिस, अब उत्तर छत्तीसगढ़ म थोड़ा स्थिति ह कम हो जाही।

अभी छत्तीसगढ़ ले पूरा बारिश खत्म नई होही। काली ले सरगुजा डिविजन म बारिश के सक्रियता ह खत्म हो जाही अऊ काली ले धीरे-धीरे दक्षिण के ओर शिफ्ट हो जाही। ओखर बाद दक्षिण ले वापस पश्चिमी विक्षोप एक बार फेर सक्रिय हो जाही।