सीएम भूपेश बघेल ह भाजपा ऊपर लगाइस एमपी के कांग्रेस विधायक मन के अपहरण के आरोप, कहिन- फ्लोर टेस्ट म बहुमत साबित करही कमलनाथ

जय जोहार रायपुर…. मध्यप्रदेश म चलत उठापटक ल लेके छत्तीसगढ़ के मुख्यमंत्री भूपेश बघेल ह भाजपा ऊपर आरोप लगाइस कि मध्यप्रदेश के कांग्रेस विधायक मन के अपहरण करे गे हे। एखर संगेसंग वो हा दावा करिस कि कमलनाथ सरकार ह फ्लोर टेस्ट म सफल होही।

मुख्यमंत्री भूपेश बघेल ह सतना रवाना होए ले पहिली पत्रकार मन ले बात करत रहिस। वो हा कहिन कि मध्यप्रदेश म बीजेपी ह अपन स्वार्थ के चलत अराजकता के माहौल बनाए हे। हॉर्स ट्रेडिंग करे जात हे। विधायक मन के अपहरण करे गे हे। प्रजातंत्र के जेन संवैधानिक व्यवस्था ह, वो तार-तार हो चुके हे। बीजेपी ह जेन कृत्य करिस, वो बेहद निदंनीय हे, जेन बादल एमपी के राजनीति म छाए हे, बहुत जल्द छट जाही। कमलनाथ बहुमत साबित कर फेर ले अपन सरकार बनाही।