शासन बनिस मसीहा, देश के 20 राज्य अऊ 4 केंद्र शासित प्रदेश मन म फंसे प्रवासी श्रमिक मन के अईसे करिस मदद
जय जोहार रायपुर…. लॉकडाउन ले प्रभावित छत्तीसगढ़ प्रदेश के अन्य राज्य मन म फंसे प्रवासी श्रमिक मन बर मुख्यमंत्री भूपेश बघेल के पहल अऊ निर्देशन म राज्य सरकार ह 14 अप्रैल शाम चार बजे तक संकटग्रस्त 64 हजार 416 श्रमिक मन ल भोजन, ठहरे अऊ चिकित्सा सुविधा समेत अन्य आवश्यक व्यवस्था सुनिश्चित कर राहत पहुंचाए हे। एमा ले अब तक छह हजार 556 श्रमिक मन के खाता म तत्कालिक व्यवस्था बर लगभग 19 लाख 12 हजार रूपिया घलो जमा करवाए गे हे। छत्तीसगढ़ के श्रमिक मन ह देश के 20 अन्य राज्य अऊ चार केंद्र शासित प्रदेश मन म संकट के स्थिति म होय के संबंध म जानकारी मिले हे।
श्रम विभाग के अधिकरी मन ह बताइस कि छत्तीसगढ़ शासन के तरफ ले संकटग्रस्त 6556 श्रमिक मन ल राहत पहुंचाए बर तत्कालिक व्यवस्था के रूप म जिला बेमेतरा के 4879 श्रमिक मन के खाता म 15 लाख 45 हजार रूपिया, मुंगेली जिला के 1483 श्रमिक मन के खाता म एक लाख 73 हजार रूपिया अऊ कबीरधाम जिला के 194 श्रमिक मन के खाता म प्रति श्रमिक 1000 रूपिया के मान ले एक लाख 94 हजार रूपिया जमा कराए गे हे।
अधिकारी मन ह बताइस कि लॉकडाउन के चलत उत्पन्न परिस्थिति मन म संकट ग्रस्त अऊ जरूरतमंद श्रमिक मन के समस्या मन के त्वरित निराकरण करे जात हे। छत्तीसगढ़ के 28 जिला मन के श्रमिक 20 अन्य राज्य अऊ चार केंद्र शासित प्रदेश मन म फंसे होय के जानकारी मिले हे. सबले ज्यादा श्रमिक जम्मू म 15 हजार 855, महाराष्ट्र म 11 हजार 718, उत्तरप्रदेश म 10 हजार 365, तेलंगाना में 7 हजार 927, गुजरात म 5 हजार 599 अऊ मध्यप्रदेश म एक हजार 686 श्रमिक मन के फंसे होय के जानकारी प्राप्त होय हे। इहीं प्रकार हिमाचल प्रदेश म एक हजार 575, कर्नाटक म एक हजार 427, तमिलनाडु म एक हजार 404 अऊ दिल्ली म एक हजार 228 श्रमिक मन के फंसे होय के जानकारी हेल्पलाईन नंबर समेत अलग-अलग माध्यम ले मिले हे।
