जय जोहार…. बिलासपुर जिला के स्वास्थ्य विभाग के तरफ ले लगभग 116 पुलिस वाला मन के कोरोना जांच करे गिस। एखर बर स्वास्थ्य विभाग ह टेस्ट किट के इस्तेमाल करे हे। बिलासपुर के बिलासा गुड़ी हॉल म मेडिकल आफिसर अऊ अन्य पैरा मेडिकल स्टाफ ह पुलिस के जवान मन के कोरोना जांच करिस। जेमा एसपी, एडिशनल एसपी, सबो थाना प्रभारी के अलावा पुलिस अऊ ट्रैफिक के जवान शामिल रहिस। ये वे पुलिस वाला हे, जेन सीधा लोग मन के संपर्क म आत रहे हे।
गौरतलब हे कि स्वास्थ्य विभाग ह तकरीबन 116 पुलिस अधिकारी अऊ कर्मचारी मन के जांच करे हे। जेमा 65 अईसे अधिकारी अऊ कर्मचारी घलो शामिल रहिस, जेखर केवल स्वास्थ्य परीक्षण करे गिस। एखर बर बिलासपुर रेंज के आईजी दिपांशु काबरा ह डिपार्टमेंट के ओर ले पहल करे रहिस।
ऊहचे एडिशनल एसपी ओमप्रकाश शर्मा ले मिली जानकारी के मुताबिक दूसर चरण म अईसे ही पुलिस अफसर मन के अऊ टेस्ट होही। जेखर ले ये पता चल जाही कि कतना पुलिस कर्मी मन ल संक्रमण होय हे। फिलहाल राहत के बात ये हे कि टेस्ट म कोनो कोरोना पाजिटिव नई पाय गे हे।
